Kandidatu Prezidente ne'e hato'o lia hirak ne'e bainhira halo mini  kampana ba dala sia ho Komunidade sira iha Aldeia Duaderok, suku Leolima, Postu Administrativu Balibo, Munisipiu Bobonaru.

Viajen kandidatu Constancio ba aldeia ne’e sai nu’udar materia ida ne’ebé nia sei tau atensaun bainhira sai PR.

Tanba, bainhira hala’o viajen ba aldeia refere, karreta ne’ebé kandidatu ho nia ekipa uza hasoru tahu dodook ne’ebé difikulta sira-nia movimentu. Constancio ho nia ekipa tenke la’o ain de’it hodi bele ba to’o iha aldeia Duaderok atu hasoru-malu ho komunidade sira.

"Ita haree kondisaun estrada husi knua mai iha suku Leolima ne'e at loos, Ita haree la'os hanesan estrada, maibé hanesan loos karau nia fatin, no suku ne'e sai hanesan loos fatin ne’ebé izoladu husi fatin hotu-hotu," dehan nia ba Jornalista sira iha suku Leolima, Kinta (10/03).

Nia hatutan, haree ba populasaun kondisaun no sira infrenta tebes Kona-ba estrada, ne'e hatudu katak Estadu no governu laiha interese atu dezenvolve suku no aldeia sira.

Nia dehan, parte governu iha ona planu programa dezemvolvimentu suku, tanba ne'e tuir loos tenke haree ba kondisaun estrada ne'e ho serius, tanba estrada ladi’ak bele fo difikulta tebes ba agrikultor sira la asesu ba Merkadu no produto lokal la folin.

"Ita haree kondisaun estrada tristi tebes ita labele liu, kareta la la'o, ha'u hanoin ida ne'e governu tenke serius resolve situasaun ne’ebé komunidade hasoru, tanba ne'e iha efeitu negativu ba ekonomia Komunidade sira nian", nia relata.

Enkuantu Kandidatu ho númeru sorteiu 11 ne'e promete mós ba Komunidade sira baihira eleitu sai Xefe estadu sei promove no prioritiza agrikultor sira hodi lori produto lokal ba fa'an iha merkadu hodi hamenus depensial importansaun husi rai li'ur.

Nune'e nia husu ba komunidade sira atu fo votus ba nia hodi implementa programa ne’ebé mak trasa ona durante nia mandatu.

"Iha suku leolima area ne’ebé mak potensial tebes ba agrikultor, se ita dezenvolve di'ak agrikultor iha suku ne'e, ha'u hanoin bele kontribui ona redusaun importansaun Ai-han husi rai li'ur", katak nia.

Nia hateten, atu reduz importansaun ai-han husi rai li'ur, persija hadia kondisaun estrada ne’ebé mak labele ignora estrada rurais ne’ebé mak liga ba aldeia no suku,  tanba estrada ne'e sai  prinsipal tebes ba populasaun sira atu  lori produto lokal asesu ba iha merkadu.

"Iha ha'u nia mandatu sai prezidente republika sei Vizita suku no aldeia sira hodi bele haree kondisaun realidade iha area rurais sira iha efeitu tebes ba ekonomia Komunidade sira iha suku ne'e no iha fatin seluk", nia informa.

Enkuantu Kandidatu ne'e promete bainhira eleitu sai prezidente republika sei Propoin ba Governu hodi prioritiza Hadia estrada rurais sira iha area remotas, atu nune'e populasaun sira bele lori produto ba asesu iha merkadu.

" Ha'u sai prezidente republika estrada ida ne'e ha'u sei halo  Propoin kedas ba iha govenu ida mai agora, tenke haruka ekipa ida mai haree kedas kondisaun estrada iha suku ne'e hodi hadia estrada ne'e ho di'ak", Tenik nia.

Iha Fatin hanesan, Komunidade ida, Paulo dos Santos sente tristreza tebes ho kondisaun estrada ne’ebé ladun di'ak hodi impede ba kandidatu PR hakbesik aan ba Komunidade sira hodi hato'o ninia programa politika.

Nia dehan, kada tinan kondisaun estrada  iha suku ne'e a'at hela de'it,  no fo impaktu tebes ba Komunidade sira hanesan agrikultor atu lori produto ba merkadu susar tebes.

Enkuantu, Komunidade ne'e hato'o ba governu aktual atu bele koloka Ekipamentu IGE nian hodi hadia kondisaun estrada refere.

Entretantu durante ukun rasik aan, Komunidade iha suku Leolima, preokupa tebes ho kondisaun estrada kontinua a'at, aliende la asesu mós ba iha bee moos.