Xefe Estadu Maior FALINTIL-Forsa Defeza Timor-Leste (F-FDTL), Maijor Jeneral Lere Anan Timur, sujere ba governu atu di’ak liu formaliza no rejistu grupu artemarsiais sira.

“Ami hato’o ona ideia balun ba governu, atu formaliza no legaliza arte Marsiais atu nune’e (bainhira halo krime) lider (artemarsiál) sira tenke responsabiliza,” dehan Lere liu husi ninia diskursu iha Sentru Konvensaun Dili, Kinta (9/2).

Ho legalizasaun ne’e, Maijor Jeneral Lere dehan, bainhira membru artemarsiasl envolve iha krime, PNTL kaptura nia lider hodi lori ba prosesu no fó pena ba lider husi grupu ne’e.

Tanba, tuir nia, maske governu bandu ona, maibé grupu artemarsial sira kontinua hala’o atividade ho subsubar.

“Artemarsial sira ne’e la’o bandidu iha fatin públiku gosta kria problema hodi soran povu,” katak Lere.

Maske nune’e, Lere dehan, grupu artemarsial nudar grupu kiik tan ne’e nia husu ba povu TL atu labele paniku hasoru grupu sira ne’e.

“Bainhira sira hamrik halo asaun krime, rai la naben, tasi la sa’e, tanba ne’e di’ak liu arte marsial labele manggame,” dehan Lere.