"Lú Olo eleitu Prezidente Repúblika hakarak buka tur hamutuk atu bele ko'alia, rezolve ita-nia problema. Bolu diálogu atu ita lori lian naksalak ne'e ba malu atu tur iha leten hodi haree ho hanoin kona-ba lia ida ne'e oinsá ita atu bele tesi," dehan nia, iha Munisípiu Manufahi, Tersa (8/3).

Nia dehan, atu problema matak ka tasak tau iha meza leten diskute hanesan Estadu nia problema, hanesan ema barak nia problema, la'ós problema privadu.

"Bainhira ita halo hanesan ne'e ita hetan solusaun ba ita nia problema sira no ita kria tan problema maibé atu halo diskusaun mak só ita nia onestidade tenke tau, problema mutin tenke mutin no metan tenke metan," hatete nia.

Bainhira servi estadu mak ida ne'e duni, servi Estadu no povu tuir nia dalan. Lú Olo eleitu Prezidente Repúblika sei haree de'it ba vontade nian ne'ebé hakerek ona iha konstitusaun.

Povu Nia Vontade Boot Liu

Entretantu, Lú Olo iha komprimisiu katak, bainhira re-eleitu mak servi de’it povu ne’e nia vontade. Prezidente Repúblika ida ne’ebé hatene de’it servi  nia povu, sente saida mak nia povu sente.

“Nia vontade la boot liu povu ne’e nia vontade, no ne’ebé nia hakarak la to’o tuir. Povu ne’e nia vontade, ita hotu hanesan la'o ba oin, kargu mak ketak ona, Prezidente Repúblika ne’e ketak ida,” dehan Lú Olo.

Maibé la'ós ida ne’e mak Prezidente Repúblika halo atu sai hanesan Xefe Estadu, tantu iha rai laran, hanesan mós ba iha rai liur, bainhira Prezidente Repúblika ba rai liur repezenta estadu ninian no mós povu ida ne’e ninian, hodi ko'alia iha organizasaun no mós nasaun ne’ebé de’it.

Presiza Respeita Kna'ar Orgaun Seluk

Kandidatu Lú Olo hatete, Prezidente Repúblika presiza respeita knaar orgaun sira seluk hanesan Parlamentu Nasionál, Governu no Tribunál.

"Prezidente Repúblika labele mete juis sira, hanorin fali juis sira. Prezidente Repúblika sei la halo hanesan ne'e," dehan nia.

Nia hatutan, husik tribunal sira servisu, aplika lei hanesan ba sidadaun hotu-hotu, atu sala ka la sala ne'e iha tribunál sira nia liman. Tanba ne'e, iha prinsipiu ida direitu, hanorin prejunsaun inosensia ne'e halai tuir husi koridor ida entre arguidu ho fali juis.