Koordenadora Klibur Feto PDRT Ainaro, Romana Pereirra, husu ba kandidatu númeru 5, bainhira eleitu nu’udar Prezidente Repúblika koalia ho governu nune’e bele estabelese ka loke sentru formasaun iha munisipiu refere.

“Bainhira ita-boot sai Prezidente Repúblika, loke netik sentru kursu ruma hanesan lian Korea no Ingles iha munisipiu Ainaro, atu nune’e ami labele ba to’o iha Dili. Tanba ami kbiit laek no ami-nia forsa la to’o atu ba to’o iha ne’ebá,” dehan nia liu husi kamapaña door to door kandidatu Anacleto iha Postu Administrativu Ainaro Vila, Tersa (08/03).

Aleinde loke sentru formasaun, nia hatutan, presiza hadia mós infra-estutura liu-liu estrada husi Postu Administrativu Ainaro Vila ba Suku no Aldeia sira.

Nia hatutan, iha Munisipiu Ainaro iha fatin turizmu barak, hanesan Ramelau, Dokomali no Bee Tiris, tan ne’e espera katak bainhira Anacleto sai Xefe Estadu sei la haluha ida ne’e.

“Iha parte ida fali tan hanesan Suku Rai, ita-nia na’i-ulun sira barak moris husi Suku Rai, partidu barak ukun ona, maibé dezenvolvimentu seidauk lao. Tanba ne’e ha'u husu de’it ba ita-boot bainhira ukun keta haluha tau-matan mai situasaun sira hanesan ne’e no labele taka-matan," dehan nia.

Romana husu mós ba Kandidatu PR Anacleto, bainhira eleitu tau-matan mós ba familia kbiit laek sira ne’ebé durante ne’e halerik maibé laiha ema ida atu hamaran sira-nia mata-been. Tanba ne’e, fiar katak PDRT sei hamaran sira nia matan-been.

Ho nune’e, hanesan Koordenadora Feto PDRT, nia husu maluk feto sira no militante sira atu vota ba kandidatu númeru 5 hodi halo mudansa no dezenvolvimentu ba Munisipiu Ainaro, liu-liu postu sira ne’ebé dezenvolvimentu la lao.

Entretantu, Kandidatu Prezidente Repúblika Anacleto Bento Ferreira hatete, bainhira eleitu ba Prezidente Repúblika nia iha poder tomak atu fó influensia no koalia ho governu hodi haree ba asuntu sira ne’e.

Tanba, nia hatutan, partidu iha kedas ona nia programa ne’ebé sei hasai povu husi kiak no mukit hodi lori povu ba moris di’ak.

“Tanba ne’e ha'u hanoin PDRT sei halo diferensia ida boot, nune’e PDRT aprezente nia kandidatu rasik no hamrik duni ho maneira rasik hodi halo diferensia, laos sai de’it lia-fuan politika iha palku ka retorika de’it, maibé tenke sai mós pratikamente,” nia hatete.