Ministru Presidensial Konsellu Ministru (MPKM), Fidelis Leite Magalhães hateten, enkontru Konsellu Ministrus aprova projetu Dekretu-Lei, ne’ebé aprezenta husi Ministru Administrasaun Estatál, Miguel Pereira de Carvalho, kona-ba alterasaun dahuluk ba Dekretu-Lei kona-ba subsídiu estraordináriu ba membru sira orgaun administrasaun eleitorál nian.

"Proposta ne'e halo hanesan de'it subsídiu montante ba Komisaun Nasionál Eleisaun (CNE) no Sekretáriadu Tekniku Administrasaun Estatál (STAE), rua ne'e labele diferente," dehan nia, iha Palásiu Governu, horisehik.

Nia dehan, alterasaun ne’e ba oin sei atribui subsídiu ho valór hanesan ba Diretór Jerál STAE no ba Prezidente CNE, atividade loron-loron nian ne’ebé partisipa durante periodu eleitorál.

“Agora ne'e hahú nia kontajen husi data ne'ebé Prezidente Repúblika deklara loron eleisaun to'o hotu, maibé ninia montante kerdizer ke loron aumenta, maibé ninia montante jerál tun montante kada indivídu, se ne’ebé la sala husi nia montante CNE no STAE no diretor sira sei hetan US$ 80.00 kada loron,” tenik nia.

Alende ne'e, Ministru Administrasaun Estatál (MAE), Miguel Pereirra de Carvalho hateten, halo alterasaun de'it, nune'e Diretor STAE sira hetan insentivu hanesan ho Komisariu CNE.

“Ne'e ita halo alterasaun de'it para ekipa Diretor STAE ne'e nia insentivu hanesan ho Prezidente CNE, Prezidente CNE sei hetan US$ 80 por dia hanesan ho Diretor STAE, tanba ida supervizions no ida realiza eleisaun no ida hetan montante ki'ik liu ne'e US$ 15, nia periodu durante a partir de Prezidente Repúblika deklara husi 16 fulan-Janeiru,” afirma nia.

Tanba iha tinan anteriór sira balun simu insentivu bele hahú husi data Prezidente Repúblika pronúnsia data eleisaun, maibé iha balun ne'ebé mak liu tiha semana ida ka rua mak foin halo kontajen, maibé liuhusi alterasaun ne'e STAE ho CNE sira hahu halo kontajen insentivu hafoin Prezidente Repúblika dekreta data eleisaun prezidensiál.

Nia afiirma, Kontratadu espesifikamente sira hodi apoia preparasaun no realizasaun ba aktu eleitorál, ho kontratu durasaun badak to’o fulan ne’en, ne’ebé termu okorre tuir mai hafoin publikasaun akórdaun husi Supremu Tribunál Justisa ho rezultadu eleisaun nian, labele benefisia ba subsídiu estraordináriu, konsidera katak objetu husi ninia kontratu, eskluzivamente, apoia preparasaun no realizasaun aktu eleitorál, laiha medida ba ida ne’e, kualkér aumentu estraordináriu husi serbisu.