“Ne’e mak maun Xanana nu'udar lider boot nasaun ninian, ohin laiha iha ne’e, mais aban ka bainrua mai bele ninia alin sira seluk sira tuur hamutuk jere situasaun ne’e,” dehan nia, iha Palásiu Prezidensiál Nicolau Lobato, Bairru-Pité, horisehik.

Ne’e duni, Lere husu ba polítiku no intelektuál sira iha Governu no Parlamentu Nasionál bainhira ko'alia tenke sukat liafuan.

“Ita labele aproveita demokrasia konforme ita nia hakarak”, tenik nia.

Tanba ne’e, Xefe Estadu, Francisco Guterres ‘Lú-Olo’ hato’o mensajen ba F-FDTL no PNTL atu mantein nafatin kumpre devér no misaun tuir Konstituisaun haruka.

“Tenke neutralidade, forsa armada no polisia se mak hali'is ba partidu ida komandu rua ne’e sei toma medida ne'ebé forte”, dehan Lere.

Nune’e, komandante fitun rua ne’e mós apela ba povu Timor tomak tuur hakmatek, husik lideransa no na’i ulun sira nia responsabilidade hodi rezolve problema ne’e.