Nia dehan, apoiante inan-aman no joven sira fila ho hakmatek ba hatudu ba familia sira ne'ebé la mai, keta haluhan 19 Marsu tuir votasaun. La'os fila husi kampña konta fali problema. Tenke kria estabilidade no unidade nasional mak importante ba ema hotu nia hakarak.

"Imi labele halo tuir hanesan iha Baukau no Same nian. See imi halo hanesan ne'e ha'u dehan imi beik-teen! Tenke hadomi malu," dehan nia, iha kampu futebol Likisa-Vila, horisehik.

Enkuantu, loron hirak liubá, iha Munisípiu Baukau, militante husi Partidu KHUNTO ho militante Fretilin tuda malu kuaze rezulta ema hirak ne'ebé ba kampana balu kanek no raan.

Aleinde ne'e, iha Munisípiu Manufahi, membru balu husi partidu FRETILIN ba hein militante husi partidu CNRT nian hodi haruka fila.

Familia La Mate iha Funu Mak Ibun Boot

Iha fatin hanesan, Lere hateten, ema ne'ebé nia familia la mate ba funu mak ohin loron ibun boot loos, maibé laiha responsabilidade.

Nia hatutan, ema sira ne'ebé ninia familia tomak mate iha funu no fakar raan ba rai ne'e nonook de'it, mas iha responsabilidade hakarak tane ukun-aan ne'e.

"Ema balu ne'ebé familia ida la mate ba funu no rai Timor ne'e, sira mak ibun boot. Mai ita ne'ebé familia mate mohu iha funu, ita iha responsabilidade para ita foti aas nafatin sira-nia mate," tenik nia.

Nia hatutan, ema balun ba halimar iha rai-li’ur familia ida nunka mate, agora dehan sira mak na'in ba rai Timor. Tanba ne’e, lalika hakruk ba ema ida no lalikan hakruk ba ema nia bosok ho osan.

Lere dehan, problema Timor-Leste nian la'os esterna, la'os ho Austrália Indonezia ka Portugal, maibé problema interna Timor nian, ukun na'in sira mak la hatene rezolve problema iha rai-laran. La hatene rezolve depois mak bosok tun-sa'e dehan ema rai-li’ur mak la konfia.

"Ema rai-li’ur konfia nafatin ita, mas ita mak la hatene jere ita-nia problema. Ita mak hanesan ne'e nafatin la hatene jere problema interna ita-nia estabilidade politika laiha mundu sei la konfia Timor, ita rasik mak halo la'os mundu mak la fiar Timor, ita rasik mak halo para ema la f'ar Ita," tenik nia.

Tanba ne'e, ukun na'in sira, liuliu sira ne'ebé sei moris tenke responsabilidade.

Votu ba Lere Laiha Duvida

Koordenador ekipa susesu Lere Anan Timur, iha Munisípiu Likisa, Nasario Jeronimo, husu Likisá oan tenke ezerse nia votu ba kandidatura Lere Anan Timur.

Tuir nia, Lere nu’udar kontinuasaun husi Likisa nia oan, Prezidente Nicolau Lobato no mós Samba 9, iklnui mós sira seluk ne'ebé balun oras ne'e mate balun sei moris.

Husu Uluk Matak Malirin ba Lere

Entretantu, antes kandidatu Lere hahú komisiu, iha Munisipiu Likisá, lia na'in husi postu administrativu tolu hamulak uluk hanesan fó matak-malirin ba hodi hato'o nia komisiu ba apoiante tomak Likisá.

Reprezentante lian na'in, Joanico dos Santos hateten, prosesu rituál ohin ne'e atu husu matak-malirin ba rai-lulik no avó beiala sira ho matebian ne’ebé mate ona tanba funu, hodi fo iis ba Lere bele alkansa nia objetivu kaer ukun.