“Ha'u promete se mak la’o ho ha’u, nia konfiansa ne’ebé fo mai ha’u la monu ba rai. Ha’u tau iha ha’u0nia kabaas atu tau-matan ba sira hodi lori sira sai husi terus no ki’ak,” dehan nia, iha kampu Sabraka-Laran, Postu-Administrativu Aileu-Vila, Segunda (7/3).

Nia hatutan, mai hodi oferese buat ruma ba povu sira liuhusi nia programa, maibé fó hanoin de’it see povu hanoin programa ne’e di’ak, la’o hamutuk ho  Isabel.

La'os promete de’it maibé halo ona ho nia fundasaun, tanba Aileu ne’e mós hetan benefisiu husi buat ne’ebé Isabel halo husi familia 61 ba programa konta bebé tanba hanesan de’it fundasaun bele halo de’it uitoan.

Nia dehan, hanesan fundasaun sira halo uitoan tanba ne'e mak nia hakarak kandidata-aan ba prezidente repúblika hanesan meiu ida bele ajuda ema barak, la’os fó ajuda ba ema 61, fó bolsa estudu ba ema na’in 26 de’it maibé bele fo barak liu.

Aleinde ne’e, fó kursu ba joven sira hanesan lian Koreia no Ingles, ne'e sai prekupa boot nasaun ne’e. Tenke prepara sira hodi hetan empregu atu bele halo númeru bo’ot no buka oportunidade oinsá joven sira bele hetan servisu tanba idade produtivu no tenke aproveita ho di’ak.

Ezerse Direitu ho Di’ak

Kandidatura Prezidente Repúblika, Isabel da Costa Ferreira, husu ba povu sira ezerse sira-nia direitu ho di’ak bainhira hakat ba sentru votasaun.

“Iha loron 19 Marsu, labele lakon loron ne’e ba iha sentru votasaun tenke ezerse imi nia direitu ho di’ak, tanba imi-nia votu ne’e hanesan osan mean ba imi. Tanba ne’e, imi mak sei determina destinu Timor nian ba tinan 5, bainhira povu sira eskolla sala mak iha tinan 5 oin mai nafatin ho situasaun ne’e,” dehan nia iha salaun Sentru Quesadhip Ruak, Same, horisehik.

Entretantu, Koordenadór Ekipa Vitória Manufahi ba kandidata Isabel da Costa Ferreira, Rumão Piedade Mendonsa, husu partidu sira seluk hodi reprezenta feto ida iha Timor-Leste hodi hasai povu husi ki'ak no mukit.

Nia dehan, partidu sira tenke hili kandidata independente Isabel Ferreira tanba nu'udar feto ida ne'ebé uluk hamriik ho fiar-aan, hamutuk ho rede klandestina sira iha tempu okupasaun luta ba direitu umanu.

Enkuantu, kandidatura Isabel da Costa Ferreira tenke manan iha rai munisípiu Manufahi atu bele reprezenta feto sira hotu iha Timor laran tomak, tanba kadidatura hotu ho nia konviksaun ida-idak maibé fiar katak kandidata independente sei halo diferensa tanba ho konviksaun Maromak, Familia no Estadu.