Konseleiru Masimu Partidu Kmanek Haburas Unidade Nasionál Timor Oan (Khunto) José dos Santos Naimori  Bukar' deskonfia iha lider balun mak sora joven sira.

Tuir nia, loloos lider sira tenke halo politika atu joven sira labele estraga malu no sai unidade hodi hanoin ba sira-nia futuru.

"Ita hotu-hotu lao hakmatek dala-ruma ema aat sira iha laran ne'e mak tuda ita arbiru de'it, keta halo hanesan ne'e, tanba ita-nia povu atu halo politika hodi defende, fó hanoin ba sira labele halo politika estraga sira, ne'e laos politika," dehan Naimori durante kampaña ba Kandidatura nùmeru 9, Armanda Berta, iha Manatutu, Segunda ( 07/03 )

Naimori dehan, iha politika manan ka lakon nu’udar buat ne’ebé normal. Tanba bainhira povu fó fiar ba kandidatu ida, nia ba atu servi povu tomak no servi mós kandidatu sira seluk.

"Berta mak manan mós ba rai ida ne'e, maun sira mak manan mós ba rai ida ne'e, la lori buat ketak ida, maibé povu hakarak domin, laos ida be tau oklu rebo-rebo, eskoltu vidru metan, deskulpa so uluk, agora arraska," dehan nia.

Naimori sente triste no konsidera militante partidu balun iha Vikeke no Baukau komete aktu brutalizmu tan ne’e nia husu ba líderansa atu tenke hatudu maturidade ne'ebe di'ak la'os politiza joven sira no soran sira iha kampaña eleitoral.

"Maluk sira tanba sa ema iha fati-fatin la tuda ita, so iha Vikeke ho Baukau mak ema tenke tuda ita? Ha'u fuan moras ho líderansa ida hanesan ne'e, ita halo politika atu asegura povu no joven sira-nia futuru, labele lori joven hodi soran malu," dehan nia.

Tuir Naimori, Timor-oan tenke hamutuk ho neon ida hodi hala’o dezenvolvimentu laos tempu kampaña lori joven sira mak sai fali ponte ba lide ninia politika.

Iha fatin hanesan, Prezidente Ekipa Susesu, Marito Magno husu ba autoridade atu tenke loke prosesu intevstigasaun ba kazu ne’ebé akontese iha Baukau.

“Ami hakarak loke prosesu investigasaun par ami bele hatene serake ne’e planeadu? Tanba parte husi kandidatu na’in rua komunika ba malu ona hodi haree atu labele mosu tan konfrontu ruma,” dehan nia.

Marito konsidera aktu iha Baukau nu’udar aktu brutalizmu hasoru militante partidu Khunto.

"Ami kondena maka’as ho hahalok brutalizmu sira ne’e. Ita hatene katak militantes Khunto ne'e laos hamriik iha estrada, sira sa’e karreta laos hamrik iha rai," dehan nia.

Tanba ne’e, nia dehan, nia parte entrega kazu ne'e ba Polísia Nasionál Timor-Leste atu halo investigasaun.

“Ita entrega ba Polisia hodi hala'o nia kna'ar, se karik mak ami-nia militante sira mak estraga duni entaun Lei mak sei kondena, karik iha apoiantes balun mak provoka no tuda mos lei mak sei kondena, ne'ebe ita entrega ba Polisia, parte justisa mak sei halo see mak loos no sew mak sala,” dehan nia.

Daudauk ne’e, nia dehan tan, ekipa susesu Armanda Berta komunika ona ho ekipa susesu Lú Olo atu bele halo investigasaun loloos kona-ba motivu husi kazu ne’e.

Martio husu ba sidadaun hotu atu respeita malu nune'e kampaña ba eleisaun Prezidensial bele lao ho susesu tuir regras ne'ebe hatuur ona no mos tuir paktu unidade ne’ebé asina ona.

Entretantu, maske iha ona kontaktu entre ekipa susesu Berta ho Lú Olo maibé tuir informasaun ne’ebé jornal ne’e asesu iha posibilidade konfrontu entre militante no apoiante Lú Olo ho Berta sei kontinua.

Tuir orariu, iha 12 Marsu ne’e, kandidatu Prezidente Repúblika, Francisco Guterres Lú Olo, sei hala’o kampaña iha munisipiu Baukau.

Ho nune’e, tuir informasaun militante no apoiante Armanda Berta iha munisipiu Baukau hala’o hela preparasaun hodi responde asaun ne’ebé apoiante husi Lú Olo halo ba sira.

Molok ne’e, iha Domingu, mosu kazu tuda-malu entre militante partidu Fretilin ho militante partidu Khunto.

Maizumenus iha tuku 2 loraik, bainhira militante partidu Khunto hala’o mini kampaña iha Baukau Villa, militante husi partidu Fretilin hahú tuda.

Ho provokasaun husi militante partidu Fretilin ne’e, militante sira husi partidu Khunto mós hahú halo reasaun no ikus mai tuda-malu entre militantes no apoiantes kandidatu Berta ho Lú Olo mós labele atu hasees.

Tuir video no imajen balun ne’ebé fahe iha media sosial hatudu, militantes partidu Khunto tuda rahun komunidade balun nia uma no loza iha area Tirilolo, Baukau Villa.

Vitima sira ne’ebé nia uma no loza rahun ezije ba kandidatu PR Armanda Berta atu hatudu ninia responsabilidade.

Iha akontesimentu ne’e, militante Khunto na’in tolu mak hetan kanek.

Hafoin kampaña remata, militante Khunto ne’ebé fila ba Laga hetan mós asaltu, maibé la konsege rezulta kanek.

Enkuantu, militante Khunto ne’ebé ba Venilale hetan tuda husi grupu dezkoñesidu ne’ebé rezulta na’in lima kanek.