Iha ninia kampaña iha munisipiu Ainaro, Assanami hato’o promesa katak, bainhira nia eleitu sai PR nia sei hasa’e subsidiu ba ferik no katuas sira.
“Uluk ita lidera Aliansa Maioria Parlamentar ita fó subsidiu $30 ba ferik no katuas sira, maibé foin lalais ha’u ho deputadu António Benevides halo proposta ohin loron ita hasa’e ona ferik no katuas nia osan ba $50, bainhira ha’u sai Xefe Estadu mak sei ko’alia ho governu hodi hasa’e ba $100,” dehan nia durante kampaña iha kampu futebol Ainaru, Sabadu (05/03).
Tuir Assanami, Prezidente Repúblika nia knaar ida mak sei hala’o politika enjeral hodi husu ba governu tenke hatene buka osan no hatama osan ba kofre estadu hodi garantia funsionamentu estadu hodi fó moris di’ak ba povu no nasaun ida ne’e.
Nia dehan, ferik no katuas sira sai hanesan eroi ba familia, tanba husi sira mak hahoris oan sira sai lider nune’e presiza osan uitoan atu sira bele goza iha sira-nia tempu restu ne’ebé iha.
Hasa’e Salariu F-FDTL no PNTL
Kandidatu Prezidente Republika (PR), Mariano Assanami Sabino, promete bainhira povu fó fiar ba nia sai Xefe Estadu nia sei konvense governu hodi hasa’e salariu membru Falintil-Forsa Defeza Timor-Leste (F-FDTL) no Polisia Nasional Timor-Leste (PNTL) atu nune’e sira bele moris dignu.
Assanami hatete, PR atu haree ba politika estadu nian, tanba ne’e bainhira eleitu ba PR sei ko’alia ho governu, liu-liu Ministeriu Defeza, atu bele hasa’e membru defeza no seguransa ninia salariu, no haree mós sira-nia hahan nune’e sira bele iha fiziku ne’ebé di’ak.
Aleinde ne’e, nia hatete tan, Prezidente Repúblika mak sai hanesan komandate supremu forsa armada nian, tanba ne’e tenke dezenvolve militar professional iha era teknolojia ne’e.
Iha rai barak, nia dehan, ohin loron dezenvolve ninia militar sai professional evolui tuir teknolojia modern.
“Ita haree rai barbarak kuandu funu sira uza ona teknolojia, ita Timor hakarak moderniza militar la’os atu halo funu, maibé moderniza ita-nia forsa atu domina teknolojia hodi kotrola ita-nia tasi ne’ebé luan,” dehan nia durante kampaña iha Kampu Futebol Likisa Villa, Domingu (04/03).
Assanami dehan, Tasi Timor ne’e luan dala tolu liu rai maran, tanba ne’e presiza kontrola hodi evita ema kontinua peska illegal iha Tasi Timor hodi naok ikan no riku soin sira seluk.
Aleinde ne’e, nia dehan, Xefe Estadu mós tenke garante instituisaun defeza no seguransa sai lutu ba nasaun no labele ameasa fila fali povu.
Tuir nia, presiza moderniza ekipamentu militar nian atu sira bele utiliza hala’o servisu hodi sai lutu nasaun ho sasan ne’ebé favoravel.
