Nelson hatete, jeneral reformadu Lere bele kura moras ne’e tanba bainhira sai Prezidente Repúblika nia hakarak atu promove dialogu.
“Jeneral Lere mai ho lia-fuan tolu importante tebtebes ba ita mak dialogu. Neduni Jeneral Lere sei mai promove dialogu, ita-nia lider sira no ita-nia nasaun moras todan tanba lider sira laiha dialogu, tanba ne'e nia (Lere) mai promove dialogu," dehan Nelson durante kampaña kandidatu PR Lere iha Gleno, Munisipiu Ermera, Segunda (07/04).
Tuir nia, Lere bele bolu Xanana, Lú Olo, Alkatiri no Horta tuur hamutuk hodi koalia ba malu, nahe biti boot tanba kaer Uma lisan, hatene ida ne'e.
Lere, nia dehan, hakarak hametin unidade ne'ebé mak rma hotu presiza no hametin estabilidade, nune'e bele iha dezenvolvimentu.
Iha fatin hanesan, Veteranu Munisípiu Ermera, Rui Sarmento hatete, to'o ona tempu Lere Anan Timur atu ukun, tanba povu fó ona votus ba lider sira seluk, agora husik tempu ba Lere hodi kompleta.
"Ermera oan sira ohin hamrik iha ne'e hato'o ba maluk sira hahú 2000 to'o mai agora ha'u lori lider sira mai hamrik ona iha rai Ermera, ohin ha'u hamrik ho figura foun Lere Anan Timur hatudu ba povu," dehan nia.
Nia lamenta, tanba lider barak mai hamrik ona iha Ermera halo promesa no hatudu programa oioin, maibé promesa sira seidauk sai realidade.
“Povu liberta ona ka seidauk? estrada liga ba Postu Sira sei aat, komunidade kontinua halerik, tanba ne'e hamutuk ho Maun Jeneral Lere Anan Timur atu marka took diferensia, hatudu ba sira seluk katak Lere mós bele,” deklara nia.
Entretantu, Lere hatete, Ermera sei kiak tanba lider sira ne'ebé ukun la tuur hamutuk, tanba ne'e Lere mak ukun sei lori sira tuur hamutuk.
"Simbolu Unidade Nasional ita halibur povu tomak, liu-liu ita-nia lider sira, se dezenvolvimentu laiha, se ki'ak iha Ermera lao bebeik tanba ita la hamutuk, tanba lider sira la hamutuk, ha'u nu'udar Prezidente Republika ha'u tenke lori sira hamutuk," dehan nia.
Maske nune’e, Lere hatete, se lider tuan sira lakohi hamutuk, husik jerasaun foun sira avansa nafatin, tanba joven sira mós bele ona, katak hadomi rai ida ne'e no hadomi mós povu.
