Nia dehan, durante kampaña eleitoral kandidatu sira iha baze hasoru apoiante no simpatizante tenke respeita nafatin paktu eleisaun pasifiku. Labele hasai linguajen la di’ak hodi ataka malu, maibé ko’alia programa. Bainhira eleitu  hanesan ema numeru dahuluk iha TL durante tinan lima bele implementa.

“Ha’u husu kadidatu sira tenke uza liafuan sira ne’ebé bele konvense eleitor sira, duke utiliza liafuan sira ne’ebé ataka ema seluk nia personalidade hodi provoka situasaun,” dehan José, iha edifisiu CNE, Kolmera, Dili, horisehik.

Tanba ne’e, CNE nafatin ho komitmentu husu ba kandidatu sira iha kampaña di’ak liu ko’alia kona-ba programa de’it, nunee bainhira eleitu ba prezidente bele fó sira-nia kontribuisaun hodi lori nasaun ne’e ba oin.

Nia dehan, durante kampaña, iha kandidatu balun ko’alia duni kona programa ne’ebé nia iha no la introduz liafuan sira ne’ebé ho karakter provoka kandidatu sira seluk, maibé iha ekipa kampaña balu halo deklarasaun iha palku la ho liafuan sira ne’ebé tendensia provokativu.

“Tanba ne’e husu ba kandidatu no ekipa kampaña sira ne’ebé iha atu respeita regra ne’ebé iha, tanba eleisaun ne’e la’ós ita mesak mak haree, maibé sosiedade internasional, liuliu Nasoins Unidas no Uniaun Europeia, ne’ebé ita tenke hatudu imajen ne’ebé di’ak hanesan nasaun demokratiku ida dixiplina,” afirma nia.

Tanba ne’e, CNE haruka ona karta ba kandidatu hotu-hotu hodi tau atensaun ba prosesu sira ne’e, tanba kampaña eleitoral foin la’o hirak de’it sira hahú ataka, nune’e evita liafuan sira ne’ebé kandidatu sira uza tenke tetu didi’ak.

“Liuliu ekipa susesu sira tenke orienta ona apoiante sira tenke respeita ema seluk, see lae bele estraga ita-nia imajen,” dehan Jose Belo.

Antes ne’e, Xefe Departamentu Relasaun Publika Komandu Jeral PNTL, Superintendente Armando Monteiro hateten, krime eleitorál akontese durante kampaña eleitoral iha loron 4 to’o 6 Marsu, iha Munisipiu Baukau, Vikeke no Manufahi, Polisia loke ona prosesu invetigasaun.

Nia dehan, durante iha kampaña krime eleitorál ne’ebé akontese iha Munisipiu Baukau, Manufahi, no Vikeke envolve militante partidu politiku sira asaltu tuda malu hodi rezulta sidadaun sira-nia sasán hetan estragu no ema na’in 16 vitima.

Tuir nia, iha Vikeke bainhira apoiante no simpatizantes sira remata kampañ fila ba idak idak nian rezidensia, maka halo agresaun fizika hasoru malu iha suku Makadiki, postu administrativu Uatulari, Munisipiu Vikeke.

“Ita husu ba ekipa susesu kandidatura  presidente republika nain16 atu kolabora nafatin, ho autoridade siguransa para hamutuk hodi kontrola unidade,  amizade, promove kultura, no haburas demokrasia iha TL, atu nune’e akontesimentu ne’ebé mak akontese iha Manufahi, Vikeke no  Baucau labele akontese iha loron tuir mai iha munisipiu sira seluk,” dehan Armando.

Tanba ne’e, PNTL mós husu ba publiku atu hakmatek labele rona boatu, maibé nafatin kontribui ba prosesu kampaña to’o iha eleisaun prezidensál.

Nia dehan, krime eleitorál ninian prosesuál tenke iha koordenasaun ho komunikasaun di'ak entre orgaun CNE ho PNTL, nune'e hamutuk evita krime eleitoral ne’ebé akontese iha Vikeke, Baukau no Manufahi.