Prezidente Partidu Trabalhista, Angela Freitas deklara ninia protidaun atu kompete iha eleisaun Prezidensial ne’ebé sei realiza iha 20 Marsu 2017.
Aleinde promete la simu salariu, kandidatu Prezidente Repúblika ne’e promete mós atu sei la simu Pensaun Vitalisia.
Hanesan públiku hatene, iha alterasaun Lei Pensaun Vitalisia (LPV), eis Prezidente Repúblika kontinua simu pensaun 100% husi salariu atual Prezidente Repúblika.
“Buat ne’ebé ha’u atu promote se ha’u eleita (nudar PR), durante tinan lima ha’u sei la simu salariu, tanba ha’u mai atu servi (povu), no promete mós katak sei la simu pensaun vitalisia,” dehan Angela bainhira deklara ninia kandidatura iha Sede Partidu Trabalhista, Segunda (31/01).
Nia apela ba povu Timor-Leste tomak atu fihir didi’ak figura ne’ebé merese atu kaer ukun nune’e labele hili sala ema.
“Imi-nia votus mak determina futuru nasaun ne’e nian. Uza imi-nia votu ba (hili) lideransa ne’ebé merese atu servi imi,” deklara Angela.
Nudar feto ida, nia dehan, bainhira eleitu nia sei sai inan ida ne’ebé bele hako’ak Timor-oan tomak ne’ebé fahe malu tanba diferensia ideia no politika.
