Iha loron 19 Janeiru foin lalais, kandidatu PR José Neves rejistu ona ninia kandidatura iha Tribunal Rekursu.

Molok ne’e, iha ona figura na’in 7, inklu Amorin ho Samala-Rua, mak deklara sira-nia kandidatura. Figura hirak ne’e mak Kandidatu husi FRETILIN Francisco Guterres ‘Lu-Olo’, José Luis Guterres ‘Lugu’ (kandidatu independente), Antonio Maher Lopes ‘Fatuk Mutin’ (independente), Kandidatu husi Partidu Demokratiku Antonio da Concenção no kandidatu husi Parentil Flaviano Carvalho.

Prezidente Tribunal Rekursu Guilerminho da Silva hatete figura hirak ne’e foti ona formulariu, maibé foin na’in rua mak rejistu.

“Ema sira mai foti formulariu, maibé to’o agora ema na’in rua de’it mak foin rejistu. Ema na’in rua ne’e mak naran José Neves no Amorin Vieira,” dehan Guilerminho ba Jornalista INDEPENDENTE iha nia knaar fatin, Kaikoli-Dili, Segunda (30/01).

Tuir lei kandidatu sira tenke mai rejistu iha TR iha loron 20 nia laran, hahú husi loron Prezidente Repúblika anunsia kalendariu eleisaun iha loron 16 Janeiru, no sei taka iha loron 6 Fevereiru.

“Atu rejistu ne’e 20 dias, dia 6 fulan Fevereiru hotu ona, ne’e ultimu dia. Lei laiha atu prolonga tan,” dehan Guilerminho.