Observadór Politika, Camilo Ximenes husu ba lideransa sira, liliu jerasaun tuan sira atu tahan an, katak labele fó sai deklarasaun ba sira-nia pozisaun atu apoiu kandidatu Prezidente Repúblika ida.

“Ha’u husu ba lider antigu sira labele deklara uluk iha públiku hodi halis ba kandidatu ida, maibé enkoraza ema hothotu ou see de’it mak atu kandidatu. Ne’e demokrasia, labele hamate demokrasia,” deklara Camilo ba jornalista sira, iha Kaikoli-Dili, horseik.

Tuir nia, jerasaun foun sira mosu ona hodi kandidata an tanba jerasaun tuan sira dehan atu transfere poder ba jerasaun foun, tan ne’e jerasaun tuan sira presiza atu kontrola an hodi labele hasai uluk deklarasaun ne’ebé bele fó impaktu ba votus.