Portavoz RNDJ-KRDTL Angela Freitas hatete, daudauk ne’e sira-nia ekipa konsege rekolla ona asinatura husi ema na’in rihun 61 no iha semana hirak oin mai sei bele kompleta trajetu asinatura 200.000.

“Ami sei ba aprezenta (petisaun) iha loron 28 fulan Agostu 2020, iha petisaun ne’e mós ami sei fó ultimatu ba Prezidente Repúblika atu fó resposta iha semana ida nia laran,” dehan Angela liu husi konferensia imprensa iha Sede Nasionál RNDJ-KRDTL, Bairo Formoza, Kuarta (05/08).

Bainhira iha semana ida nia laran mak PR Lú Olo la fó resposta, Angela deklara, RNDJ-KRDTL sei organiza povu hodi halo asaun pasifiku hodi ezije PR Lú Olo rezigna an.

“Ema hotu-hotu hatene katak poder politika hakerek ona iha artigu 62 (K-RDTL), poder politika iha povu nia liman, povu mak hili no hatur i povu mak sei hasai, enkuantu governante sira la konsege servi povu, la tuir regras demokrasia, konstituisaun ne’ebé konsagra tiha ona, tenke iha responsabilidade,” nia hatete.

Tan ne’e, nia husu ba povu TL tomak atu labele matan dukur, no bainhira RNDJ-KRDTL povu tomak mós presiza kontribui masimu.

“Petisaun ne’ebé RNDJ-KRDTL hato’o husu Prezidente Repúblika tenke rezigna an, tanba viola tiha ona konstituisaun. Ami sei hato’o ba PR atu rezigna an hodi entrega poder ba ema ne’ebé povu tuu ba ne’e atu determina, see mak atu ka’er ukun no see mak bele reintifika prosesu atu forma governu unidade nasional,” deklara Angela.

Anjela dehan baihira petisaun ne’e mosu no PR Lú Olo hakarak rezigna an, RNDJ-KRDTL nia ema preparadu atu troka.

Figura ne’ebé RNDJ-KRDTL prepara, nia dehan, nu’udar ema ne’ebé iha konfiansa husi povu atu bele rezolve ka solusiona situasaun iha rai laran.