Konsellu Ministru iha Tersa (04/08) haruka pedidu EE ba Prezidente Repúblika, no iha Kuarta (05/08), PR konvoka reuniaun Konsellu Superior Defeza no Seguransa, no Konsellu Estadu, hafoin hetan aseitasaun, PR Lú Olo husu autorizasaun ba Parlamentu Nasionál.
Iha loron ne’e kedan, PN realiza plenaria estra-ordinaria hodi diskuti no ikus mai autoriza PR hodi deklara EE dahaat.
Hafoin PN autoriza, PR Lú Olo deklara aplikasaun EE dahaat hahú husi ohin to’o 4 Setembru 2020.
Liu husi ninia mensajen ne’ebé jornal INDEPENDENTE asesu iha pajina facebook Presidencia da Republica Democratica de Timor-Leste, PR Lú Olo hatete, hafoin periodu naruk TL la rejista pozitivu Covid-19, iha 4 Agostu mosu kazu pozitivu Covid-19 foun iha TL.
Maske nune’e, tanba situasaun interna ohin loron la ezije medidas restritivas ne’ebé forte hanesan períodu EE datoluk liu ba, tanba ne’e EE foun ida ne’e sei parsialmente suspende no limita direitu ba sirkulasaun internasionál, liberdade sirkulasaun no fixasaun residénsia iha territóriu nasionál no mós direitu ba rezisténsia.
PR Lú Olo husu atu tau atensaun espesiál ba pontus entrada ba territóriu nasionál atu bele hasees husi risku Covid-19 tama tan iha TL, no sidadaun sira ne’ebé tama iha TL tenke submete ba kuarentena, katak sei moris ketak iha fatin ida durante loron 14.
“Ba estadu emerjénsia ida ne’e atividade ekonómika, sosiál, kulturál, eskolár, serbisu, halimar, vizita família, toka no kanta sei la’o hanesan bainbain,” dehan PR Lú Olo.
Maske nune’e, PR Lú Olo husu atu hotu-hotu tenke haktuir prátika fase liman beibeik, uza máskara no distansiamentu social, atu idaidak bele hasees an Covid-19, no karik moras, la hada’et ba ema seuk.
Entretantu, Komisaun Permanente PN aprova pedidu PR Lú Olo atu deklara EE dahaat ho votus a favor 20, kontra 0, no abstensaun 0.
“Rezolusaun númeru 58/20 pasa nune’e autorizasaun estadu emerjénsia pasa ho rezerva plenária extraordinária ba konfirmasaun ba autorizasaun ida ne’e husi Parlamentu Nasionál sei halo iha loron tersa, 11 Agostu 2020,” dehan Prezidente PN Aniceto Guterres, iha PN, Kuarta (05/08).
