Tuir Adolmando, nu’udar nasaun demokratiku, ema hotu-hotu iha direitu atu espresa sira-nia hanoin maibé tenke mós hatene nia dalan.
Nia dehan, grupu RNDJ-KRDTL mai ho prinsipiu people power katak atu hatun Prezidente Republika tanba konsidera PR Lu Olo laos ona PR ba povu tomak, maibé PR ba partidu balun de’it, tanba ninia desizaun barak, tuir versaun RNDJ-KRDTL, kontra ona artigu barak iha K-RDTL.
Maibé, nia dehan, resposta husi Palasiu Prezidensial, liu husi Xefe Kaza Sivil, katak buat hotu-hotu ne’e desizaun tribunal nian, laos desizaun PR nian.
“Se ita ataka de’it Prezidente (Repúblika) no Prezidente hatudu ba Tribunal Rekursu, ita la hatene loos ita nia ezijensia sira ne’e bele hetan nia rezultadu ka lae? grupu ne’ebé organiza husi Angela Freitas tenke hare didi’ak ida ne’e,” dehan Adolmando iha nia knar-fatin, Segunda (20/07).
Tan ne’e, nia hatete, grupu RNDJ-KRDTL tenke buka hatene no haree loloos katak desizaun sira ne’ebé halo ne’e see mak atu deside, PR ka Tribunal Rekursu, atu nune’e preukupasaun sira ne’e bele kanaliza tuir dalan hodi bele hetan solusaun.
Adolmando hatete tan, iha nasaun demokratiku ida bainhira povu ida de’it sente iha desizaun ruma ne’ebé ladun di’ak, nia iha direitu atu hato hanoin no la presiza dalan ida ne’ebé mak legal liu atu espresa.
Maibé, nia esplika, atu mobilija povu hodi hamrik iha situasaun hanesan ne’e hodi hatan ba ema ida-rua nia preokupasaun defisil tebtebes.
“Mezmu ke povu ne’e hatene hela katak desizaun balun la tuir ona K-RDTL no dalan legal sira, tanba liga ho Covid-19 no impasse politika ne’ebé halo governu lao de’it ho duodesimu, halo situasaun ekonomia lao ladun di’ak, halo povu baruk ona atu hamrik tan bainhira ema organiza tan ba sira-nia interese”.
Tenba ne’e, nia hatete, ema sira ne’ebé mak responsabel ba iha asaun ne’e tenke iha kapasidade atu oinsa bele influensia povu sira hodi hamrik hotu, nune’e kontestu people power ne’e bele realiza duni.
“Se agora ne’e mak sira hakarak atu hatun PR, sira tenke iha kapasidade atu mobilija povu iha territoriu tomak atu hamrik hotu. Uniku dalan mak ida ne’e ona, se povu iha teritoriu laran mak hamrik hotu hodi ezije, ne’e PR bele tuun, maibé se povu ne’ebé hamnbrik hanesan de’it ho sira-nia tarjetu ema na’in rihun 50 de’it, ne’e Prezidente Repúblika labele tuun,” dehan Adolmando.
Ba dalan legal hodi hatun PR, Adolmando dehan, iha tempu agora defisil tanba labele hetan 2/3 husi Deputadu iha PN hodi vota a favor atu hasai PR nia imunidade.
“Bainhira akontese asaltu poder hodi hadau meza PN, sira iha ona forsa politika ida hodi bele assegura governu no Estadu ne’e to’o nia mandatu remata,” katak nia.
Tan ne’e, nia dehan, atu hatun no trava PR ne’e husik povu mak deside iha eleisaun 2022.
“Povu kompriende no koñese di’ak ona lider sira, povu sei deside lider ida ne’ebé mak merese duni sai PR, ida ne’ebe mak merese duni sai governante par depois bele tau duni atensaun ba povu nia moris no dezenvolvimentu ba rai ne’e.”
“Agora dadaun ne’e ita haree lider hotu-hotu hamrok ba iha poder de’it, depois de eleisaun sira uza instrumentu ba poder ne’ebé povu fó ba sira, maibé dezenvolvimentu lao hakdasak de’it,” deklara nia.
Iha fatin ketak, Diretór Ezekutivu Asia Justice and Rights (AJAR) José Luis de Olveira hatete, dalan atu hatuun Prezidente Repúblika mak liu husi Parlamentu Nasionál no Tribunal.
“Liberdade ba manifestasaun ne’e direitu ida maibé Angela impoin ninia hakarak ka obriga de’it Angela nia hakarak, ida ne’e inkonstituisionál. Konstituisionál mak ne’e, se Angela hakarak hatun Prezidente Repúblika tenke liu husi Parlamentu Nasionál no mós Tribunál, labele Angela hatun husi dalan de’it, ne’e inkonstituisionál,” dehan Jose Luis.
José Luis dehan, pesoalmente nia aseita ho Angela ne’ebé manifesta ninia hanoin, tanba ne’e ninia direitu nu’udar sidadaun ida, maibé nia la aseita ho dalan ne’ebé Angela foti.
“Se agora Angela manifesta ne’e ha’u aseita, ne’e nia direitu, maibé nia atu obriga hatun Prezidente Repúblika liu husi dalan ida ne’e, ne’e ha’u la aseita, ne’e abanbainrua loke dalan, see mak sai Prezidente Repúblika ita fila ba riba tuun fali, ne’e ita atu la’o ba ne’ebé? nia direitu ba manifestasaun, nia protesta buat ruma, nia la satisfeitu ho buat ruma, ne’e nia direitu, ne’e nia iha razaun atu manifesta, maibé labele impoin, tenke respeita ema seluk ninia komptensia.”
“Angela laiha dalan atu hamonu Prezidente Repúblika, se nia protesta de’it, laiha buat ida, kecuali liu dalan golpe de’it, ba hadau de’it, hanesan agora Prezidente PN, ne’e golpe de’it, lori forsa ba hadau de’it, agora Angela mós hanesan lori forsa ba hadau de’it, nia ba okupa fali, ne’e bele, maibé ne’e nia tenke hetan apoiu husi forsa (F-FDTL), forsa tenke iha nia liman,” dehan nia.
