Kampana iha kampu Taibesse, hafoin Lere Anan Timur to'o lia-na'in Munisípiu Dili simu ho lian dadoli tuir kultura Mambae nian, nahe hela biti ho bora hodi hein Kandidatu hodi ukun rai ida ne'e, lulik hotu iha Timor sei akompaña Lere.

Tuir ekipa susesu kandidatura Lere nian, Bernardo de Cristo Pereira Teki Timor hateten, kampaña LAT nian iha Taibesse hatudu mean nakonu, ne'e hatudu Lere la mesak, nia sei manan.

"Ita hotu ohin iha ne'e ita hatudu ona entuziasmu boot ba ita-nia avo, ita-nia aman Jeneral Lere Anan Timur ho ekipa tomak prezensa iha ne'e, la'os Jeneral mesak ka subalterna rezistensia mesak de'it, maibe ohin iha ne'e mean domina iha ne'e," dehan nia, iha Kampu Temporal, Taibesse, horisehik.

Nia dehan, iha ne'e kor mean mak barak la halimar, hatudu Lere la mesak. Fi'ar katak mean ne'ebé nakonu sei vota ba Jeneral Lere, nune'e bele ba tuur iha Palasiu Prezidensial Nicolao Lobato.

"Iha ne'e kor mean mak barak liu, ha'u pesoal koordenador suku no mós membru konsellu politiku nasional (CPN) Fretilin mean iha postu Dom Aleixo. Tinan hirak liu ba ha'u ho kamarada sira hili ita-nia partidu hili mós ita-nia prezidente, ohin ha'u hamutuk ho imi iha ne'e ita hili Lere Anan Timur," dehan nia.

Nia afirma, Lere mak estrutura mai husi baze la'os diretamente ba estrutura, maibe hahu husi baze mak sa’e ba leten, la'os husi leten mak tun fila-fali mai kraik.

"Kamarada sira ita iha ne'e hakarak ka lakohi lori ita-nia kandidatu ba Prezidente Republika. Bainhira ita hili ita-nia kandidatu Prezidente Republika saida mak ita nia lia-menon ba ita-nia kandidatu rasik marka diferensa," teknik nia.

Si’ak Ema Oportunista no Koruptor

Kandidatu Prezidente Republika, Lere Anan Timur (LAT), iha nia komisiu, promete sai Prezidente Republika sei siak ba ema ne'ebé oportunista no koruptor sira, mas la siak ba nia povu.

Nia hatete, hanesan dehan iha Dili ema hotu-hotu koñese sé mak Lere. Dala-ruma nakdedar ba Lere nia ameasa sira bainhira sei militar, ema militar tenke si’ak, militar labele mamar, maibe agora la si’ak hakarak hadomi povu.

"Ha'u mak sai Prezidente Republika ha'u mamar hadomi imi hotu, si’ak ne’e tempu liu ona. Ha'u nu'udar jeneral guirileiru sai aman ba nasaun hadomi ha'u-nia povu, mas ha'u sei si’ak ema koruptor, baruk-teen sira no mós ha'u sei siak ba ema oportunista sira," tenik nia.

Nia afirma, ema rihun ba rihun ba mate faluk oan ki'ak ohin loron sei halerik, tanba ne'e mak lakohi hakiak ema na’ok-teen iha Timor-Leste no lakohi hakiak mós ema foti aan iha Timor. Tanba ne'e, Timor ukun aan lakohi hakiak mós ema baruk-teen, tenke servisu atu lori nasaun ba oin.

Biar kamarada sira patriota nasionalista hanoin Dili laiha ema ida ke la koñese Lere, maibe hotu-hotu koñese, mas iha Suai ho Oekusi inan-aman barak mak la koñese sé mak Jeneral Lere Anan Timur.

"Maibe ha'u mosu iha sira-nia oin sira hakuak rein tanis, tanba sira rona de'it naran mas la haree oin. Mas ha'u hasoru sira, ha'u ama sira mama malus kose sira nia malus been ba ha'u nia oin no sira tanis tanba sira hadomi duni ha'u no ha'u mós hadomi duni sira," dehan nia.