"Ita-nia idozu, klaru governu iha ona politiku subsidiu ba sira, maibe sei uitoan hela. Kona-ba ita-nia maluk defisiensia sira ne'e, ha'u hanoin seidauk iha atensaun ne’ebé aas ba sira. Tanba Estadu no governu la kria kondisaun ba sira," dehan nia, iha sede, Hudi Laran, horisehik.

Nia hateten, maluk ho defisiensia ne'e mos iha dever no direitu hodi kontribui mos ba dezenvolvimentu iha nasaun ne'e.

"Ita persiza mós iha fatin ida ne’ebé espesifiku ba maluk ho defisiensia sira, ita triste tebes haree defisiensia barak tuur iha estrada ninin tane liman ba ema", katak nia.

Tanba ne'e, nia dehan, Estadu ho Governu tenke fó atensaun hodi kria fatin espersifiku no fó subsidiu ba idozu ho valór aas no mos fo subsidiu ba maluk defisiensia sira.

"Osan ne’ebé governu fó ba idozu sira ne'e ki'ikoan liu, tanba sira ne'e sai hanesan momentu últimu idade iha mundu ne'e. Ha'u hanoin tenke fo subsidiu ne’ebé di'ak uitoan ba sira hodi goza sira-nia vida", tenik nia.

Tanba, subsidiu ne’ebé fó ba idozu sira ne'e la sala buat ida, nune'e Governu tenke fó atensaun ba ida ne'e.

"Ida fali mós ita tenke fó mós tratementu dignu ba sira, liuliu iha tratamentu saúde, ita haree katak idozu no defisiensia barak mak iha difikuldade hetan moras ba ospital ema ladun fó atensaun ba sira," nia dehan.

Nia hatutan, iha eskola mós tenke fó oportunidade ba ema ho defisiensia sira hodi bele asesu ba edukasaun ne’ebé ho dignu no hodi sira bele mobiliza aan sai nu'udar ema ne’ebé matenek.

"Ha'u sei fó atensaun boot ba iha idozu no defisiensia sira, bainhita hetan fiar husi povu sai nu'udar xefe estadu", hakotu nia.

Kansela Kampana iha Oekusi-Atauro

Entretantu, kandidatu Constancio Pinto, kansela kampana dialogu iha Rejiaun Adminitrativu Espesiál Oekusi-Ambenu (RAEOA) no Munisipiu Atauro ho razaun kbiit la to'o hodi halo kampana iha fatin ne’e.

"Ha'u hato'o mensagem ba povu RAEOA no mos Atauru ne’ebé fizikamente ha'u labele to'o iha ne'eba hamutuk ho ha'u nia ekipa hodi hato'o ha'u-nia programa ka komprimisiu politiku," dehan nia.  

Tanba ne'e, kandidatu ne'e husu deskulpa ba apoiante sira, tanba kansela kampana ho razaun kbiit no forsa la to'o, maibe nia fó nafatin fiar ba eleitor sira atu fo votu ba nia.

"Ba maluk militante programa ne’ebé ha'u tranzmite ona ba iha maluk sira iha munisipiu seluk hanesan mos ba iha povu RAEOA no Atauru," tenik nia.

Nia Informa, bainhira povu fó fiar eleitu sai Xefe Estadu sei aman ba ema hotu no la’ós ba partidu politiku ka individu ruma, maibe sai aman ida oinsá mak atu rezolve povu nia situasaun.

Nune'e, kandidatura ne'e husu ba populasaun tomak iha RAEOA no Atauro atu votu ba kandidatu prezidente.

Enkuantu, kandidatu ne'e garante katak militante sira sei fó vitoria ba nia hodi sai prezidente republika ne'e mak prontu atu serve povu hotu ho laran tomak ho vizaun di'ak ba povu tomak.