Nia dehan, kestaun ne'ebé sai preokupasaun mak korajen órgaun eleitorál sira atu foti sansaun ba hotu-hotu kandidatu Prezidente Repúblika sira foun no tuan sira, la'ós tuan de'it maibé hanesan kandidatura José Ramos Horta ho pezu ne'ebé boot.

Tanba hetan apoiu husi partidu boot hotu, entaun órgaun eleitorál brani foti medida ka lae hasoru kandidatura José Ramos Horta bainhira liafuan ruma akuza ka viola regra ruma, ne'e mak sai preokupasaun boot tanba penalu funsióna de'it ba partidu ki’ik.

"Edukasaun atu fó hatene ba ita-nia sidadaun sira atu hili ita, la'ós tanba obrigada no la'ós tanba tauk hetan malisan bainhira ita lakon, maibé sira hili tanba sira fiar duni no reprezenta nia aspirasaun no nia atu manan ka lakon ne'e nia kontente nafatin, tanba nia hili tuir nia hakarak,” dehan Virgílio, iha Salaun CNE, Sesta (11/2).

Nune'e, bainhira kampaña, nia sei konsentra de'it ba programa. Tanba ne'e, nia respeita kandidatura Prezidente Repúblika no sei la halo akuzasaun no defama maibé buat ne'ebé nia halo mak konsentra ba saida mak halo bainhira sai PR.

Nia dehan, antes ne'e nia mós hanesan Prezidente Konsellu Imprensa (KI), órgaun instituisaun ne'ebé tau-matan ba konduta étika jornalista sira nia, entaun bainhira tama iha atividade polítika tenke sai ezemplu ida ba ko'alia ne'ebé iha respeita, iha étika, norma moral iha sosiadade ida.

Nia hatete, Timor-Leste ne'ebé fraternidade liu katak tenke haree malu hanesan inan feton entaun labele loke oportunidade hodi hatuun malu no defama malu iha prosesu kampania nian", nia dehan.

Diretór Ezekutivu Interinu FONGTIL, Helio Dias da Silva, hateten, FONGTIL hola inisiativa halo diálogu ba kandidatura PR atu antisipa labele mosu penalti iha tempu kampaña  eleisaun prezidensiál nian nune'e sira tenke iha komitmentu no tuir lei ne'ebé iha.

Entretantu, Vise Prezidente CNE, Domingos Barreto hatete, emprinsipiu CNE hakruk deit ba lei, CNE la hakruk ba lideransa se de'it, ba kandidatu se de'it, se mak viola lei mak iha ema hotu nia leten, ema hotu hakruk ba, hakruuk ba konstituisaun, hakruk ba kodegu penál no hakruk ba regulamentu sira ne'ebé iha.

Maibé kandidatu se de'it maun bo'ot Ramos Horta, mana Armanda Berta ka se de'it mak viola lei prosesu la'o nafatin.

Hanesan esprensia uluk iha tinan 2016-2017 bainhira eleisaun lider balun ba fahe sasan hanesan iha loron rua neebé silensiu maibé sira lori sasan ba fahe.

Nunee horsehik Kinta (10/02) CNE iha Oekussi ida ne'e sai kestaun bo'ot ida populasaun sira husu hanesan ne'e, entaun iha tempu kampaña ne'e lei mak bo'ot liu ka CNE mak bo'ot liu ka governu mak bo'ot liu, tanba iha tempu ne'eba loron silensiu nian lideransa bo'ot balun haruka ba fahe sasan.

Maibé iha loron rua ne'e silensiu, loron ida laiha tan ona atividade kampaña ninian entaun saida mak CNE halo koordenasaun ho polísia Ministériu Públiku halo atuasaun sasan sira nee prende hotu.

“CNE preparadu ita hotu iha lei nia okos, sei implementa de'it lei ne'ebé emvigor iha ita nia nasaun ida ne'e,” hakotu nia.