Tuir Xefe Departamentu Programa INDDICA, José Correia da Piedade, hateten, parte INDDICA hato'o ona karta pedidu ba CNE hodi halo diskusaun. Nunee, sei involve iha prosesu monotorizasaun iha kampaña eleisaun prezidensial iha tinan ida nee.
"Ita manda ona karta pedidu ba iha CNE ho STAE atu involve parte INDDICA nian, hodi halo diskusaun, atu nune'e parte INDDICA bele hala’o ninia knar kona-ba monotorizaun ba kandidatu sira iha kampaña eleisaun atu labele envolve ka labele mobiliza labarik sira," dehan nia ba Online INDEPENDENTE iha nia kna'ar Fatin kaikoli, Tersa ne'e (15/2).
Nia dehan, tuir artigu 47 Konstituisaun RDTL koalia kona-ba Direitu Sufrajiu, maibé la koalia kona-ba direitu labarik, enkuantu, iha kodigu sivil nian iha artigu 182 hateten katak, ema ne'ebé ho idade 17 mai kraik protejidu laiha direitu ba sufrajiu ka vota.
Tuir nia, INDDICA sei prepara mós materia ruma hodi aprezenta ba CNE hodi halo aprovasaun, hafoin sira bele halo diskusaun nee.
Nia haktuir, seidauk iha data fiksu ba diskusaun ne'e, maibé antes tama ba loron kampaña, iha semana oin sei halo diskusaun.
Tanba ne'e, nia parte husu mós ba inan-aman sira atu labele involve ka haruka oan sira faan sasan iha ambitu loron kampaña, tanba ida nee, bele fó risku ba labarik sira.
"Ita mós husu ba inan aman sira atu labele iha momentu importante kampaña nian, labele haruka oan sira fa'an sasan iha mobilizasaun massa ida ne'ebé bo'ot, atu nune'e labarik sira labele hetan risku," katak nia.
Iha sorin seluk, Prezidente CNE, José Agostinho da Costa Belo, hatete, CNE simu ona karta pedidu husi parte INDDICA no possibilidade sei halo diskusaun. Nunee, parte rua ne'e bele hato'o sira nia idea ka solusaun atu bele asegura labarik sira iha tempu kampaña.
"sim, husi parte INDDICA hato'o ona karta pedidu ne'e mai, katak possibilidade ita involve sira hodi halo diskusaun, tanba involvimentu labarik sira iha kampaña mós barak, tanba ne'e iha diskusaun ida ne'e para asegura labarik sira nia direitu hodi labele involve iha kampaña,"dehan Prezidente CNE.
Prezidente nee haktuir, loron atu halo diskusaun seidauk termina, maibé nia garante katak diskusaun nee sei halao iha tempu badak.
Entretantu, Presidente Repúblika Fransisco Guterres Lú Olo dekreta ona loron kampaña, hahú iha loron 2 to'o 16 Marsu, no loron votasaun ba eleisaun presidensial sei hala'o iha 19 Marsu tinan 2022.
Asistente Editor: Saturnina da Costa
