Iha eleisaun Prezidensial foin lalais, governu TL loke de’it sentru votasaun iha nasaun rua, Portugal no Australia, maibé foin lalais ne’e Parlamentu Nasionál aprova ona rezolusaun ida atu loke tan sentru votasaun iha Korea no Inglatera.

“Iha eleisaun paramentar agora ita sei halo resensiamentu eleitoral no atualizasaun baze de dadus iha nasaun haat hanesan Korea iha Seul, Inglaterra, Portugal no Autralia,” dehan Diretór Jerál Sekretariadu Tekniku Administrasaun Eleitoral (STAE), Acelino Manuel Branco hafoin fahe informasaun kona-ba prosesu kampaña eleitoral ba Partidu Politiku (Parpol) sira iha salaun STAE, foin lalais.

Tan ne’e, nia dehan, STAE liu husi Ministériu Estatal serbisu hamutuk ho Ministériu Negosiu Estranjeiru no Kooperasaun sei haruka ekipa ida hodi dezloka ba nasaun haat ne’e hodi hala’o prosesu resensiamentu no atualizasaun baze dadus ba Tiomor-oan sira.

 Parpol Prepara Fiskais 5.605

STAE husu ba Partidu Politiku (Parpol) sira atu hahú ajusta ona sira-nia militante na’in 5.605 hodi sai fiskais ba eleisaun parlamentar. Fiskais hirak ne’e sei koloka ba sentru votasaun 1.121. Tuir Lei kada Sentru Votasaun tenke iha fiskais na’in lima (5).

Diretór Jerál STAE, Acelino Manuele Branco hatete, papel fiskais Parpol sira importante tebes atu garatia labele mosu manipulasaun no transparensia hahú husi setru votasaun to’o munisipiu no nasionál.

Tuir Lei Eleisaun, loron 7 molok kampaña eleitóral Parpol sira tenke hatama ona listas fiskais partidu nian ne’ebe mak atu destaka iha sentru votasaun nune’e STAE bele halo ona akreditasaun.

“Ha’u hanoin (fiskais) ne’e importante tebes, tanba ne’e partidu poliku sira tenke peepara ona nia ema mai husi suku,” dehan Acelino.

Nia dehan, ba Parpol sira ne’ebé laiha fiskais laiha lei atu kondena maibé Parpol ne’e labele kestiona bainhira mosu buat ruma iha sentru votasaun.