Taur dehan, FRETILIN ukun ho minoria (30) hasoru maioria (35), la domina iha Parlamentu Nasionál hodi halo governu la’o iha frajilidade nia laran bainhira aprezenta orsamentu no programa ba PN.

“Ha’u hanoin ita sukat podér polítika ne’e iha númeru votu kadeira, primeiru FRETILIN, segundu CNRT, ha’u nian (PLP ho kadeira) ualu, terseiru. Ne’ebé, FRETILIN responsabilidade uluk, tuir fali CNRT, ha’u kala terseiru karik”, dehan nia.

Hataan jornalista karik, VII Governu monu bele mosu VIII Governu, Taur lakohi espekula, tanba ema hotu sei akompaña senáriu polítika ne’ebé la’o daudaun.

Taur dehan, foin lalais ne’e mós nia ko‘alia ho nia-maun Xanana kona-ba situasaun polítika ne’ebé la’o hela iha TL.

“Ha’u ko’alia ho maun Xanana iha telefone, ha’u hato’o ha’u nia preokupasaun kona-ba frajilidade ba insidénsia ba pozisaun FRETILIN”, tenik nia.

Taur dehan, iha Timor la’ós figura (Xanana-Taur) ka CNRT no PLP mak iha influensia boot, maibé se CNRT no PLP hamutuk sei laiha KHUNTO partidu rua boot ne’e mós la vale.

Nia dehan, problema ne’ebé halo FRETILIN ukun la maioria, tanba KHUNTO halai la’ós kauza hosi PLP ka CNRT maka halo.