Partidu sira ne’ebé foti ona pozisaun ba dahuluk mak partidu mais votadu, Frente Revolusionáriu Timor Leste Independente (FRETILIN). Abertamente deklara ona hakarak atu ukun, maibé partidu ne’ebé sai tarjetu mak CNRT. Maski nune’e, partidu segundu mais votadu ne’e seidauk fó sinál pozitivu ruma.
Partidu FRETILIN nu’udar partidu mais votadu, hatudu nafatin prontidaun hodi kaer governu.
Sektáriu Jerál partidu FRETILIN, Mari Alkatiri hateten, sira sei la ukun mesak, tanba kompromisu polítika partidu nian durante kampaña ne'e dehan FRETILIN manan, Xanana manan.
Eis-Primeiru Ministru ne’e hateten, FRETILIN lakohi ona ba opozisaun tanba tinan sanulu nia laran ona sai opozisaun.
Entretantu, partidu rua seluk ne’ebé mós foti pozisaun hanesan FRETILIN mak Partidu Demokrátiku (PD) no KHUNTO.
Prezidente Partidu Demokrátiku (PD) Mariano ‘Assanami’ Sabino hateten, sira nia partidu prontu atu ukun tuir lema partidu nian ne’ebé hateten ‘Ba O Timor, Ami Maubere Oan Prontu Serve’.
Nia hatutan, liu husi votu ki’ik ne'ebé povu fó ba PD, sei esforsu hodi serve tuir kbiit ne'ebé povu fó votu ba partidu refere.
“Votu ne'ebé inan-aman sira fó mak ida ne’e. Ami sei serve tuir kbiit no tuir votu ne'ebé fó. Se votu ne’e boot, ami halo tuir kompromisu ne'ebé ami halo durante promete iha ami nia kampaña, mais tanba votu ne’e ki’ik, ami sei esforsu saida mak bele halo ba rai ida”, katak nia.
Pozisaun hanesan mós hato’o husi partidu KHUNTO. Prezidente partidu, Armanda Berta dos Santos hateten, sira hetan kadeira lima, ne’e duni bainhira partidu mais votadu bolu atu serbisu hamutuk prontu atu la’o hamutuk.
Ne’e duni, atu koligasaun ho partidu mais votadu partidu KHUNTO hein de’it konvite.
CNRT Seidauk Hanoin Koligasaun
Antes ne’e diáriu ne’e publika ona katak, partidu Congresso Nacional Reconstrução Timor-Leste (CNRT) seidauk iha hanoin atu halo koligasaun ho partidu seluk hodi forma governu tanba sei foti pozisaun iha konferénsia nasionál, ne’ebé sei realiza loron 29 Jullu 2017.
“Desizaun ne’e mai hotu husi konferénsia rasik”, dehan Sekretáriu Jerál partidu CNRT, Francisco Kalbuadi Lay.
PLP Hakarak ba Opozisaun
Entretantu, Partidu Libertasaun Populár (PLP) foti ona pozisaun klaru katak sei ba opozisaun iha Parlamentu Nasionál. Laiha hanoin ruma atu ba halo koligasaun ho partidu mais votadu sira.
Prezidente PLP, Taur Matan Ruak hateten, sira-nia pozisaun mak opozisaun, tanba partidu CNRT ho FRETIIN mak sei forma Governu.
“Ami pozisaun mak oposisi, mais ami opozisaun ida ne'ebé konstrutivu, opozisaun ida edukativu,” dehan nia, iha Palasiu Prezidensiál, Ai-Tarak Laran, horisehik.
Taur hatutan PLP kompromete-aan sai opozisaun ne'ebé mais edukadu, rasionál no konstrutivu.
