“Maun boot Xanana ne’e Prezidente CNRT. Agora atu foti sai no haketak ne’e la hetan. Tanba partidu CNRT iha regra. Ne'e duni desizaun sira ne'ebé importante tenke liu husi konferénsia partidu,” dehan Sekjer Partidu CNRT, Francisco Kalbuadi, iha Sede CNRT, Bairru Grillos, horisehik.

Nia dehan, Prezidente Partidu CNRT mak Xanana Gusmão agora estrutura metin hela ho nia, entaun partidu ida sei labele la’o ho ema ida mesak.

Tanba ne’e, Partidu FRETILIN hakarak bolu de’it Xanana ne’e difisil, maibé hakarak halo koligasaun ho CNRT, entaun tenke hein konferénsia.

Maibé, tuir nia, konferénsia ne’e mós tenke konvoka reuniaun iha territóriu tomak para bele foti desizaun finál ida kona-ba pozisaun CNRT nian atu halo koligasaun ka lae.

Kalbuadi dehan, agora daudaun Prezidente CNRT nia preokupasaun la’ós iha de’it partidu. Nia tau interese nasionál ne’e aas liu interese partidu nian.

“Ami iha ne’e simu nafatin orientasaun servisu husi prezidente (Xanana) nian,” tenik nia.

Buat ne'ebé importante iha estatutu partidu CNRT nian, Prezidente iha direitu prerrogativa ba saida de’it. Maibé, nia entrega fali desizaun ne'ebé importante ba estrutura nasionál to’o munisípiu sira mak atu deside.

“Entaun, iha partidu CNRT nia laran Prezidente ninia prezensa ho ami nian prezensa hanesan de’it”, hateten Kalbuadi.

Apela Militante CNRT Mantein Kalma

Vise-Prezidente Partidu CNRT apela ba militante, apoiante no simpatizante partidu nian iha territóriu Timor laran tomak atu mantein kalma.

Esforsu hotu-hotu halo ona maibé kuandu desizaun sai mak la afavor hotu-hotu tenke simu ho laran.

“Ita sei hein to’o Supremu Tribunál Justisa (STJ) anunsia sai kona-ba rezultadu final ba eleisaun ne’e”, tenik nia.

Iha fatin hanesan, Sekjen CNRT, Francisco Kalbuadi Lay, husu ho militante hotu-hotu atu kuda nafatin ambiente hakmatek, saudavel, hadomi malu.