Aleinde, sira mós husu ba Xefe Estadu atu ukun ho di’ak, liu-liu tau matan ba povu nia moris diak.
Anjelina Tavares de Jesus, inan husi EhD, hatete, sira nia oan ho kondisaun defisiénsia, maibé iha vontade no kontente hakarak ezerse mós sira nia direitu nuudar sidadaun ida iha país demokrasia ne’e.
Tanba ne’e, hanesan inan ida, husu ba Kandidatu na’in rua ne’e, bainhira eleitu tenki fó atensaun mós ba EhD sira.
"Karik Kandidatu Prezidente Republika ida ne'ebé mak manan, ukun ho di'ak ba, halo di'ak ba povu liu-liu EhD sira, nune’e defisiénte sira mós senti kontente," dehan nia ba jornalista sira iha sentru votasaun EBF, Farol, tersa ne’e.
Nia hatutan, klaru katak, ema ne’ebé ho kondisaun defisiénsia no vulneravel presiza tulun husi na’in ulun sira, maibé laos atu apoiu ho material de’it, sira presiza mós hetan apoiu nesesidade bazika ruma.
"Ami husu Governu mós tau matan, labele NGO mak fó tulun de'it kursi roda, maibe Governu mós tenke fó apoiu, se la sala ami simu kursi roda ne'e husi Governu dahuluk nian, maibé agora la simu," nia relata.
Entretantu, Inan ne’e, haktuir, bainhira iha prosesu votasaun, oan ne’ebé ho kondisaun defisiénsia nia la vota ho segredu, maibé nia inan mak akompaña tuu hela kandidatu ida ne’ebé sira hakarak hili.
Tanba, nia oan ne’e moris mai ho kedas kondisaun defisiénsia fiziku.
Tuir observasaun husi Online INDEPENDENTE, asesu iha terenu nota katak, Ema ho Defisiénsia ne’e mai vota, ninia inan mak dudu nia iha kursi roda mai iha sentru votasaun EBF Farol, hodi ezerse sira nia direitu vota, iha tuku 09:00 OTL.
