Enkuantu, nia haktuir, hanesan EhD no mós sidadaun Timor-oan sira ezerse ona sira nia direitu no partisipa ona iha eleisaun prezidensial primeira ronde no segundu ronde nian.
Maibé ida ne’e, sira seidauk senti vota ho diak no segredu tanba Governu seidauk kria kondisaun ne’ebé diak ba sira.
"Iha Vota nee, ami hanesan ema ho defisiensia matan, entaun maluk sira mak akompaña ami hodi vota, hanesan polie staff sira inklui mós ajensia internasional UNDP, sira ne’e mak ami fó fiar akompaña ami hodi deside vota tuir ami nia konsensia,”dehan nia ba Online INDEPENDENTE, iha Sentru Votasaun Paralelu GMT, tersa ne’e (19/04).
Tuir nia, iha vota ne’e, ema ho defisiénsia matan fó deit sira nia lian, hafoin mak staff sira tuu.
Ho nune’e, nia espera, iha Governu foun mai bele kria kondisaun diak ba sira, liu husi fasilita letra braille iha prosesu votasaun atu sira bele vota direita no segredu.
"Ami hanesan sidadaun ida tenke ezerse ami nia direitu hodi fó ami nia votu tuir ami nia konsensia, ho ida ne'e, ita espera katak Xefe Estadu ida bainhira lidera nasaun ida ne’e, bele tau matan ba ema hotu liu-liu ba ema ho defisiensia matan sira, atu nune'e laiha deskriminasaun,"tenik nia.
Nia esplika, hanesan iha artigu 16 koalia kona ba igualdade universal no artigu 21 katak, sidadania ne'ebé ho defisiensia mós iha direitu hanesan ho sidadaun sira seluk.
Tanba ne’e, nia husu ba Governu atu kria kondisaun diak bae ma ho defisiénsia matan iha eleisaun parlamentar mai, atu nune'e sira bele vota ho segredu hanesan mós ho sidadaun sira seluk.
Entretantu, tuir dadus, total ema ho defisiénsia iha teritoriu laran tomak hamutuk rihun 38.118, inklui ema ho defisiénsia matan hamutuk rihun 14.828.
