Iha fulan hirak ne’e nia laran sei iha eleitoradu foun ne’ebé foin atinji tinan 17. Ne’e duni, importante ba STAE halo resenseamentu hodi bele aumenta mós taxa partisipasaun eleitór iha eleisaun parlamentár.

Deputadu Francisco da Costa hateten, atualizasaun baze dadus iha tinan kotuk taka findu anu, hahú husi ne'ebá kandidatu eleitór mós aumenta, tanba ne’e buka meius atu bele rejista sira.

“Governu tenke halo fali resenseamentu foun, atu nune’e sira mós bele tuir eleisaun hodi ezerse sira nia funsaun hanesan ema sidadaun, ne'ebé moris iha nasaun ne’e”, tenik nia, iha sesaun plenária parlamentu nasionál, horisehik.

Iha fatin hanesan, deputada Jacinta Pereira Abucau dehan, sidadaun ne’ebé foun tinan 17, balun foin lalais ba STAE atu halo resenseamentu eleitorál atu bele partisipa eleisaun parlamentár, maibé STAE seidauk bele loke resenseamentu foun.

Nia hatutan, atu aumenta tan taxa partisipasaun iha eleisaun parlamentár oin mai governu liu órgaun eleitorál sira tenke halo ona preparasaun molok tama ba eleisaun.

Nia hatutan, kuandu governu ho STAE konkorda loke resenseamentu, tenke husi nivel munisípiu to’o postu administrativu, labele desentraliza iha fatin ida depois mak eleitór buka fali.