Tribunál Rekursu fó sai rezultadu ba kandidatura mak hanesan kandidatura António Maher Lopes hetan votu 9.102 (1,8%). Francisco Guterres ‘Lú-Olo’ 295.048 (57,1%), Amorin Vieira 4.283 (0,8%), José Neves 11.663 (2,3%), José Luis Guterres 13,513 (2,6%), Maria Ângela Freitas 4.353 (0,8%), Luis Alves Tilman 11.125 (2,2%), António da Conceição ho votu 167.794 (32,5%).

Ho rezultadu ida ne’e, ofisialmente tribunál rekursu legaliza kandidatu Francisco Guterres ‘Lú-Olo’ nu’udar prezidente repúblika ho ronda ida de’it.

“Kandidatu Francisco Guterres ‘Lú-Olo’ hetan votu 57,1% husi votu válidu, tanba nia hetan maioria votu husi kandidatura na’in ualu ne’e”, dehan Prezidente Tribunál Rekursu, Guilhermino da Silva, iha ninia servisu fatin, horisehik.

Iha fatin hanesan, Segundu Komisáriu Comissão Nacional Eleições (CNE), Duarte Tilman hateten, hafoin apuramentu distritál no nasionál fiksa iha CNE laiha reklamasaun no rekursu hasoru desizaun provizóriu. Ne’e duni liu oras 48 nia laran CNE remete mai tribunál rekuu hodi legaliza.

“Durante prosesu sira ne’e laiha reklamasaun. Ne’e duni, tribunál rekursu anúnsiu ona ba rezultadu eleisaun jerál ne’ebé primeiru volta hetan kedas rezultadu mais ke 57,1%”, tenik nia.

Nia dehan, definitivamente Presidente eleitu ba períodu 2017 to’o 2022 mak Francisco Guterres ‘Lú-Olo’.

Entretantu, kandidatura prezidente repúblika, Luis Alves Tilman, ne’ebé partisipa mós iha anúnsiu ne’e deklara, nu’udar Timoroan tenke fó apresiasaun ba prezidente eleitu.

“ita lakon iha kompetisaun, maibé lakon hanesan timoroan. Tanba ne’e ita tenke apresia ba prezidente eleitu. Nia iha kapasidade atu bele lori povu no ba rai ida ne’e, tanba ne’e mak ita tenke fó fiar ba prezidente foun ne’e”, nia hateten.

Tuir ajenda, xefe estadu foun sei simu tomada de pose iha selebrasaun restaurasaun independénsia iha loron 20 Maiu 2017.