Nia dehan, moris ho sistema demokratiku ema hotu-hotu iha direitu hakarak atu halo saida de’it, hakar atu ba iha ne’ebé, ema iha direitu atu halo politika, maibé tenke unidade iha sosiedade nia leet, nune’e labele hamosu konflitu entre joven ho joven sira.

“Ba direitu politiku sira ne’e ha’u la mete, mas apela para mantein ho ita-nia espiritu ida halo ita moris nafatin ho situasaun ne’ebé kalma no hakmatek,” dehan Aluk, iha Palasiu Governu, horisehik.

Nia dehan, husik politiku na’in sira hala’o sira-nia politika, mas sidadaun ida-idak inklui parte seguransa buka oinsá atu asegura estabilidade para hotu-hotu hakmatek, atu ema idak-idak halo nia vida lorloron nian.

Molok ne’e, Polisia Nasional Timor-Leste (PNTL), hanesan Instituisaun estadu sai lutu ba nasaun no povu, tanba ne’e prontu garante seguransa iha kampaña no eleisaun prezidensiál.

Komandante Jeral PNTL, Komisariu Fautino da Costa hatete, PNTL hanesan instituisaun Estadu prontu garante seguransa iha kampaña eleisaun presidensial sei hahu iha tinan ne’e sei la’o ho di’ak.

“Servisu rotina polisia nian, liuliu atu garante eleisaun iha tinan ne'e la’o di'ak no seguransa ba kampaña nasionál mós la'o di'ak,” dehan nia.

Nia dehan, PNTL nia obrigasaun hala'o servisu tuir lei no orden no tuir Konstitusaun, tanba PNTL instituisaun estadu tenke hadutu dixiplina hodi servisu povu no nasaun.