Prezidente CNE José Belo informa, hafoin muda lei prezidensial nian koalia mós sei estabelese sentru votasaun paralelu 3 ne'ebé estabelese ne'e, atu fasilita no halo atendementu ba sidadaun sira liu-liu estudante sira neebé husi munisipiu, negosiante no mós ba maluk sira neebé akompaña moras sira iha óspital.
"Iha tempu eleisaun, iha posibilidade atu sira labele fila ba sira nia fatin tanba kestaun transporte, hare mós ba aspetu ekonomia ne'ebé todan ba sira, entaun lei ne'e fó solusaun ba sira atu bele rezistu iha Dili, liu-liu iha fatin ne'ebé CNE ho STAE prepara ona",dehan nia iha salaun CNE, sesta horseik (28/01).
Tanba nee, Prezidente CNE husu ba Autoridade Lokal no mós Reitor iha Universitariu sira atu halo kordenasaun ho estudante no sidadaun neebé mai husi munisipiu atu bele halo rejistu.
Entretantu, Diretór Jeral STAE, Acilino Manuel Branco, hatete, atu garente eleisaun nee ho susesu presiza sosializasaun ba eleitores sira.
“ Implementasaun sentru votasaun paralelu nee ho susesu ita presiza halo sosializaun para depois apoiu orgaun eleitoral sira. Atu nunee, ita nia eleitores sira neebé aban bainrua sei ezerse sira nia direitu iha sentru votasaun paralelu nee bele komprende nia mekanismu oinsa atu partisipa,”dehan nia.
Nia hatutan, tanba iha prosesu balun neebé eleitores sira presiza atu atravesa mak sira tenki ba halo inskrisaun, atu responde ba sidadaun hotu,
Ho nunee, sentru votasaun paralelu nee, sei estabele deit iha Kapital Dili.
Enkuantu, sentru votasaun tolu sei estabelese iha parte leste, sentral no oeste.
Totál sentru votasaun iha teritóriu nasionál hamutuk 1.191, inklui sia (9) iha diaspora.
Asistente Editor: Saturnina da Costa
