“Nuudar Prezidente Republika saida mak ha’u hanoin hela desde primeiru dia kedas atu loke programa espesial ida ba klase minoridade iha Timor-Leste, liu-liu ba ema ho defisiénsia, feto no labarik feto no mós familia ne’ebé vulneravel liu. Maibé ha’u nia observasaun rasik katak, ba entre klase minoridade sira ne’e, ida komunidade LGBTQI ne’e mak hetan diskriminasaun makas iha sosiedade,”dehan nia nudar kandidatu Prezidente Repúblika husi partido PDRT, iha Postu Administrativu Atsabe Vila, kuarta (02/03).

Tanba ne’e, nuudar Prezidente Republika hamutuk ho Governu sei foti inisiativa ida hodi halo sosializasaun makas iha sosiedade Timor-Leste atu bele simu realidade moris ne’e katak, ne’e laos opsaun duvidas maibé ne’e kriatura maromak mak halo iha klase minoridade ne’e.

Nia akresenta, sei fó apoiu masimu total ba ministeriu relevante sira ne’ebé iha knar atu haree ba familia vulneravel sira, hodi utiliza poder influensia ne’ebé Prezidente iha hodi halo melloria, karik ministeriu relevante sira ladun fó atensaun no la halo intensifikasaun ba atendementu lolos ba klase sira hanesan ne’e.

 “Tanto Prezidente Republika sei iha nia mekanismu ida mak liu husi poder de influensia atu bele influensia governu hodi fó antensaun espesial ba ema hirak ne’ebé ita kategoria sai klase minoritaria, liu-liu realidade ita timor nian, foin sai husi funu ita nia faluk no oan kiak barak mak iha ita nia rain ida ne’e, ita labele halo tranformasaun ida ne’ebé diak ba ema hotu, maibé ho esforsu no voltade ne’ebé iha, ho domin ne’ebé iha, ita tenta atu pelumenus tinan ida rejolve uituan no tinan tuir mai bele rejolve tan uituan,”tenik nia.

Bainhira nune’e, desde inisiu kedas fazeadamente bele hetan ona prefeisaun maibé bele hadia dadaun ona tranformasaun ba klase minoridade husi klase ne’ebé aat liu ba moris ne’ebé bele fó haksolok ba sira.

Tanba ne’e, nia garante sei katak, hakarak halo mundansa laos deit ho politika maibé ho vizaun no realidade moris rasik.