Xanana hatete, partidu politiku ida hamriik ho hanoin ‘saida mak nia atu halo ba povu ida ne’e no ba rai ida ne’e’, katak partidu politiku ida kuandu atu hamriik, tenke hamriik ho objetivu ida ne’ebé loos.
“La’e mosu partidu politiku barbarak hanoin de’it ba tau sira-nia ema tuur iha Ministru, Vise Primeiru Ministru, sira la halo buat ida, naran tuur de’it fulan-fulan osan tenke tama,” dehan Xanana liu husi ninia diskursu, iha sede nasionál Kandidatura Prezidente Repúblika, José Manuel Ramos Horta, Hudi-Laran, Sesta (28/02).
Loloos, tuir Xanana, partidu politiku ida hamriik tenke ho vizaun no planu oinsa atu dezenvolve rai ida ne’e.
Iha oportunidade ne’e, Xanana hato’o mós kritika ba kandidatu Prezidente Repúblika númeru 6, Francisco Guterres Lú Olo, tanba konsidera Lú Olo halo violasaun ba Konstituisaun RDTL bainhira nia assume kargu nu’udar Prezidente Repúblika.
“Iha 2001 asembleia konstituinte diskute no hakerek, aprova konstituisaun nu’udar lei inan ba RDTL. See mak tempu ne’ebá sai Prezidente (Asembleia) Konstituinte? oan sira kiik sira kala la hatene ema ida naran Lú Olo ne’e.”
“Lú Olo ne’e Prezidente Asembleia Konstituinte, halo diskusaun oinsá, nusa mak hakerek konstituisaun, depois hakerek no aprova tiha mak iha lei inan ida.”
Iha konstituisaun hakerek ba simu pose ‘ha’u jura atu kumpre konstituisaun no leis’, maibé nia rasik hakerek no asina kontituisaun no jura ba Maromak, ba rai ida ne’e, ba povu tomak no nia an rasik, sei kumpre konstituisaun no halo ema hotu-hotu kumpri konstituisaun, maibé ema kumlaude sama tiha konstituisaun, nia hakerek kontituisaun SMP hela, maibé agora sa’e tiha kumlaude ne’e, hasai kursu direitu kumlaude, nia sama tiha fali konstituisaun, viola konstituisaun,” dehan Xanana.
Tuir nia, ida ne’e nu’udar krize boot ida, tanba bainhira sama no viola ona lei inan, lei oan sira la vale ona, tanba ne’e mak iha Parlamentu Nasionál hada’u kadeira, kontra no viola rejimentu PN nian.
Entretantu, bazeia ba dadus Partidu Politiku no bloku ka koligasaun ne’ebé partisipa iha eleisaun Parlamentar 2017, total partidu politiku ne’ebé eziste iha Timor-Leste hamutuk 21 mak hanesan Partidu Milenium Demokratiku (PMD), Partidu Liberta Povu Aileba (PLPA), Partidu Demokratika Republika Timor (PDRT), Asosiasaun Popular Monarkia Timorense (APMT), Klibur Haburas Unidade Nasional Timor Oan (KHUNTO), Partidu Esperansa Patria (PEP), Partidu Sosialista Timor (PST), Partidu ba Dezenvolvimentu Popular (PDP), Kongresu Nasionál Rekonstrusaun Timor-Leste (CNRT), Partidu Republikanu (PR), Uniaun Demokratika Timorensa (UDT), Partidu Demokratika Kristaun (PDC), Movimentu Libertasaun Povu Maubere (MLPM), Partidu Libertasaun Popular (PLP), Partidu Demokratiku (PD), Unidade Nasional Demokratika Resistensia Timor (Undertim), Partidu Unidade Dezenvolvimentu Demokratiku (PUDD), Partidu Timorense Demokratiku (PTD), Frenti-Mudansa, Partidu Sosial Demokrata (PSD), Sentru Asaun Sosial Demokrata Timorense (CASDT), Partidu Dezenvolvimentu Nasionál, no Frente Revolusionariu Timor-Leste Independente (Fretilin).
