Lere la’os de’it koalia ho momoos, maibé mós la ‘nega’ ema, liu-liu sira ne’ebé uluk sai ninia komandante durante tempu rezistensia.

Naran ida ne’ebé Lere sempre temi mak atual Prezidente partidu CNRT, Kay Rala Xanana Gusmão.

Maske Lere sente lamentavel uitoan bainhira Xanana hili liu ‘tula liman’ ba Ramos Horta hodi kandidata an ba Prezidente Repúblika, duke nia, maibé Lere la tau ida ne’e sai nu’udar kestaun boot ida.

Asaun simples ne’ebé bele sai prova husi maturidade Lere Anan Timur mak bainhira nia hetan Xanana ho Horta, nia tuun husi nia karreta hodi ba kumprimenta lider na’in rua ne’ebé apoiu malu ne’e.

Iha Kinta (03/03), tuku 16.51, hafoin fila husi kampaña eleitoral iha munisipiu Vikeke, Lere hetan Horta ho Xanana hasoru hela sira-nia apoiante iha area Ossu.

Lere husu kondutór para karreta no nia tuun ba hasoru Horta ho Xanana hodi kumprimenta.

Iha konversa ne’e, Lere hato’o kona-ba ninia abertura kampaña iha munisipiu Manatuto iha 2 Marsu 2022.

"Horisehik ami iha apa (Xanana) nia rai, mais ami-nia rai hotu,” dehan Lere.

Xanana ho halimar hatan “Ha’u-nia rai German (Alemaña)”.

Hafoin konversa badak ne’ebé amigavel no dezena ho hamnasa ne’e, Lere husu lisensa no husu nia espoza bensa Xanana nia liman.

“Entaun di’ak ami ba lai. Rei Aman Sarani nia liman,” dehan Lere ba nia espoza.

Molok hakat, Lere basa Horta nia liman kabun hodi husu vota ba númeru 8. “Depois…vota ba númeru 8”. Horta hakuak kedas Lere hodi dehan “Ha’u hatete tiha ba media…iha fulan ida liu ba Avo Lere di’ak liu ba haree nia manu rade sira, bee-oan sira.”

Ho sira na’in rua nia konversesaun komiku ne’e, halo Avo Nana, Lere no Horta nia apoiante sira hamnasa, hodi kria ambiente amizavel tebes.

Hafoin ida ne’e, bainhira besik atu tama ba nia karreta laran, Lere sei hakilar viva CNRT no viva Fretilin.

Lere ho nia ekipa kontinua ninia viajen ba Baukau, enkuantu Xanana ho Horta kontinua sira-nia atividade no tuir plannu sei kontinua viajen ba munisipiu Vikeke.

Lere: Xanana Moris Tanba Lorosa’e Fó Bensaun

Kandidatura Prezidente Repúblika númeru 8, Tito da Costa Cristovão ‘Lere Anan Timur’ hatete, bainhira Manatutu-oan sira hadomi Xanana sira tenke hadomi mós Lere.

“Manatutu-oan sira imi hadomi maun Xanana imi tenke mós hadomi ha’u. Maun Xanana moris tanba lorosa’e ne’eba fó bensaun, maun Xanana mak ha’u-nia maun boot, ha’u mak tuir nia, tanba ne’e mak Manatutu-oan sira hadomi mós ha’u. Ohin loron hamrik iha ne’e imi haree ha’u mesak, mais ami na’in rua mak hamrik hela iha ne’e,” dehan Lere iha abertura kampaña eleitoral iha Manatutu Villa, Kuarta (02/03).

Lere hatete, saudozu David Alex Daitula sempre akompaña nia no nia reprezenta mós Daitula hodi kandidata an.

“Ami na’in rua kandidatu ida de’it atu ba Prezidente 2022-2027, nia mak moris karik ohin loron ha’u mós seidauk kandidata aan, tanba nia mak Sub Xefe I, ha’u mak Sub Xefe II,” dehan nia.

Maske nune’e, Lere lamenta ho desizaun Lú Olo rekandidata an no desizaun Sekretariu Jeral Fretilin, Mari Alkatiri, hodi fó apoiu ba Lú Olo.

“Lalika fiar bandeira Fretilin ne’ebé tau iha bulletin votu, bandeira Fretilin ne’e laos sira nian de’it, sira hakarak privatiza bandeira Fretilin, ema ida labele nega katak Lere laos Fretilin. PLP mai husi Fretilin, CNRT mai husi Fretilin, labele dehan katak PLP de’it uma-lisan ketak, CNRT uma-lisan ketak, maibé mesak maun-alin ida de’it, saida mak halo sai maun-alin laos osan, maibé raan ho isin mak kesi hamutuk tanba ne’e sei la soe malu, ema seluk mak sei bele fahe lider sira.”

Lere hatete, Xanana hala’o kampaña iha Lospalos tanba nia fó bensaun ba Horta, Lere iha Manatutu tanba simu bensaun husi avo Kay Rala.

“Ramos Horta sei lakon tanba Xanana mak fó bensaun, Lere sei manan tanba Kay Rala ho Kay Olo mak fó bensaun. Lú Olo sei lakon tanba Mari ho Lú Olo lisan la hanesan.”

Iha fatin hanesan, Deputadu Bankada PLP, Cornelo Gama L7 hatete, husu atu Manatuto-oan fó sira-nia votus ba Lere.

“Imi-nia aman mak ida ne’e ona, ukun mak ida ne’e ona, bainhira loos mak 2027 imi eskoila imi-nia maun-alin jerasaun foun hodi ukun fali, ha’u husu ba inan-aman matenek primeiru hili ita nian maun Xanana tutuir malu mai to’o ultimu imi nia aman Lere Anan Timur,” katak nia.