Naimori fiar metin katak jeneral reformadu ne’ebé kandidata an mós ba Prezidente Repúblika sei la manan iha eleisaun.

“Horisehik (Sabadu) ha’u-nia aman Lere iha lospalos, ha'u iha Lautem, ohin (Domingu) ha'u iha ne'e (Baukau) atu dehan de'it ‘Aman, ita-boot sei la manan, ita-boot nia oan feto Berta mak manan’,” dehan Naimori durante kampaña ba kandidatu PR, Armanda Berta, iha kampu futebol Triloka, Munisipiu Baukau, Domingu (06/03).

Naimori hatete, partidu ne’ebé nia lidera lakohi fó apoiu ba Lere hodi kandidata an ba PR tanba fundadór sira ne’ebé uluk funu ba rai ida ne’e la fiar malu no la unidade.

“Se buat hotu unidade karik, fiar malu, ha'u-nia aman Lere mak hamriik iha oin, ohin ha'u mós hamriik iha nia kotuk. Mais hotu-hotu hakarak hada’u dehan katak sira mós sai lideransa, ha'u-nia aman (Lere) ita-boot la manan, ita-boot nia oan feto mak sei manan,” Naimori afirma.

Tanba fundadór rai ida ne’e no maun boot sira la rona malu, di’ak liu iha eleisaun PR hili feto ida ne’ebé bele hakruk no hadomi sira.

So Berta

Tuir Naimori, jerasaun tuan sira ne'ebé luta ba rai ida ne'e nia idade hahú avansadu ona nune'e presiza iha jerasaun feto ida atu bele hadia povu nia moris.

“Ita haree ita-nia aan sira ne’e komesa idade ba bebeik ona, sira atu liberta povu ne’e susar ona karik, tanba ne’e mak nu’udar jerasaun foun mak bele liberta povu no rai ida ne’e so Berta de’it,” dehan Naimori.

Iha fatin hanesan, Kandidatu PR husi partidu Kmanek Haburas Unidade Nasionál Timor Oan (Khunto), Armanda Berta dos Santos hatete, bainhira povu fó fiar ba nia sai PR nia sei liberta povu husi kiak no mukit.

Aleinde ne’e, nia dehan, nia sei garante katak sei laiha diskriminasaun ba sidadaun ida.

“Ha'u-nia komprimisiu sei promove justisa sosial no inkluzaun hodi garante povu hotu-hotu asesu ba justisa no la halo diskriminasaun ba sidadaun see de’it mak iha nasaun Timor-Leste ida ne'e hodi bele hetan tratamentu ne’ebé di’ak ba povu nia moris,” deklara Berta iha ninia kampaña.

Ba kestaun politika, Berta dehan, sei hametin relasaun fundamental ba povu tomak ho direitu no tramentu hanesan iha Lei nia okos.

“Iha Komprimisiu ida ne'e ha’u sei hametin liberdade ba sidadaun hotu-hotu nu’udar siblu fundamental atu bele ezerse sira-nia direitu no liberdade ba sidadaun hotu,” dehan nia.

Bainhira eleitu sai PR, Berta sei respeita separasaun poder entre orgaun soberanu sira ne’ebé hatuur ona iha Konstituisaun RDTL.

Berta sei hametin mós relasaun ho parte igreja no halo dialogu ho grupu juventude sira atu kria pas no estabilidade iha rai laran.

Kandidatu númeru 9 ne’e dehan, nia mós sei la halo diskriminasaun no estigmasaun politika pasadu ba kualker sidadaun TL.