Jeneral reformadu ho naran sarani Tito da Costa Cristovão ne’e dehan, kompromisiu CNRT ho Horta hodi dizolve PN la’os buat fasil ida.

“Dizolve Parlamentu Nasinonal la'os buat fasil, fetosan-umane de'it kuandu kotu ne'e problema boot kuantu mais nasaun ida nia vida, Ramos Horta brani tebes, mais ema hatene sei la vota ba nia, tanba sei hamosu tan problema ka krize foun ida,” deklara Lere iha ninia kampaña iha Atauro, Domingu (06/03).

Maske halo kompromisiu politiku ho CNRT, maibé Lere fiar katak Horta sei la halo ida ne’e. Nia aseita ho CNRT tanba hakarak kandidata an ba PR.

“Ba ha'u lakohi impase politika, ha'u hakribi impase politika, tanba krize ha'u hatene ona, impase politika mós ha'u hatene ona, iha dalan seluk atu rezolve, ne'e ita-nia problema interna," Lere dehan.

Tuir Lere, bainhira mosu problema interna loloos labele rai iha estrada par ema hotu hatene, tan ne’e labele hanoin hanesan Horta nian atu dizolve PN.

"Ita nia independensia ne'e sei frazil, tanba ne'e ita ukun an dala ida laos ukun an dala rua, nune'e tenke marka diferensia hodi rezolve no lori povu ba moris di'ak, tinan 20 ona povu sei mukit hela," katak nia.

Tito da Costa Cristovao hatete, tinan lima ida ne'e uniku, bainhira Lere mak ukun sei marka diferente nune'e lori Lider hotu tur hamutuk nune'e bele hakotu tiha impase ne'e, la'os atu hamosu fali impase foun hodi aumenta aat tan, tanba povu ne'e hasoru terus barak lo'os ona.

Hein Resposta Bainhira Horta sai PR

Iha fatin ketak, Kandidatu Prezidente Repúblika númeru 14, José Manuel Ramos Horta konsiente katak ema hahú koalia iha fatin-fatin katak bainhira nia sai PR sei kria krize iha rai laran.

“Ha’u lakohi ataka lider pesoalmente, maibé buat balun ha’u sei resposta, maibé ha’u resposta iha ha’u-nia diskursu nu’udar Prezidente Repúblika iha Parlamentu Nasionál,” dehan Horta iha ninia kampaña iha Kampu Sabraka Laran, Suku Malere, Postu Administrativu Aileu Vila,  Munisipiu Aileu, Domingu (06/03).

Iha oportunidade ne’e, Horta husu mós ba militante partidu CNRT, PST, Patifor, ASDT, Frente-Mudansa, PDC, PSD no movimentu sira hotu atu bele fó apoiu masimu ba ninia kandidatura hodi manan iha eleisaun.

Nia mós husu hotu-hotu kria estabilidade, paz no dame atu nune’e festa demokrásia tinan ida ne’e bele la’o di’ak.

Iha fatin hanesan, Prezidente Partidu CNRT, Kay Rala Xanana Gusmão hatete, ohin loron Timor-Leste iha krize mia laran, maibé krize ne’ebé akontese iha leten.

“Populasaun la baku malu tanba krize iha leten ne’ebá, loos duni ida ne’e mak di’ak duni, ne’e mak hatudu duni katak povu ida ne’e matenek duni. Ida ne’e mak hatudu katak povu aprende husi krize ne’ebé iha 2009 hakilar ba mundu ‘Adeus Konflitu, Benvindu Dezenvolvimentu’,” katak nia.

Tan ne’e, nia dehan, maske krize krize boot mosu iha leten maibé povu tuur hakmatek no hetan de’it mak ninia impaktu negativu.