“Hanesan Prezidente Republika ita sei fó apoiu ida makaas ba servisu diplomatiku ba relasaun internasional hodi bele eleva no mellora fila fali vizibilidade Timor-Leste nian iha mundu internasional no hadia fila fali kreadibilidade nasaun nian atu mundu fiar fila fali Timo-Leste, hanesan uluk ita foin restaura independensia to’o mai iha antes 2006 konflitu ne’ebé lori ita ba kuaze rai naruk,” dehan nia iha kampaña door to door ho tipu dialogo, iha Suku Aituri Laran, Postu Na’i Feto, Tersa (15/03).

Nia hatutan, maibé depois mundu rekupera fali nia fiar ne’e no hafoin resolve tiha konflitu 2006 ne’e, komesa iha 2009 nasaun nia kreadibilidade politika hanesan nasaun ida sa’e fila-fali.

Enkuantu, durante mandatu ida ne’e nian ho situasaun evolusaun ne’ebé mosu ona odio no vigansa husi forsa politika sira, nasaun nia kreadibilidade politika internasional iha pontu interogasaun boot.

Tanba ida ne’e, hanesan Prezidente Republika sei lori fali nasaun no sei halo vizibilidade ne’e diak iha mundu internasional liu husi kriasaun kondisaun interna, garante seguransa iha rai laran ho diak atu bele sai fali fatin ida ne’ebé país viziñu sira fiar katak, Timor-Leste iha duni nasaun ida livre, independente no demokrasia.

“Ha’u hanoin ne’e hanesan knaar Prezidente Republika nian atu dehan ba governu katak tenke esforsu ba programa dezenvolvimentu hotu-hotu tenke ho orientasaun ida ba povu ho demokrasia, laos de’it orientasaun ida ne’ebé limitada ba knar ka poder politika partidaria nian,”

Aleinde ne’e, bele mós liu husi dalan ida, halo nomeasaun ba reprezentante diplomatiku ka emabaixador labele bazeia ba meritu politiku ka estatutu iha partidu nia laran, maibé tenke halo nomeasaun ida ba diplomata sira liu husi kareira no merito professional atu bele halo reprezentasaun ida ne’ebé diak iha rai liur.

Tanba ba reprezenta nasaun RDTL iha rai liur, laos atu ba reprezenta de’it nia partidu no forsa politika.

Tanba ne’e, hanesan Prezidente Republika sei dehan ba governu atu halo selesaun ida ho rigorozu tebes, atu bele hili lolos ema ne’ebé hatene servisu iha area diplomatika nian atu bele sai emabaixador ka reprezentante iha rai liur.

 Entretantu, apoiantes Angelina de Jesus, hatete, nia pronto fó nia votus ba kandidatu PDRT nian, Anacleto Bento Ferreira, tanba haree ba partidu ne’e kiik maibé nia halo ona buat barak ba povu nia moris diak. Liu-liu responde ba asuntu bee moos no familia kbiit laek sira.

“Iha uma kain ida rua mak hetan ona ajuda husi Partidu Demokratiku Republika Timor, partidu ne’e seidauk koalia maibé realiza uluk no seidauk fó hatene hanoin uluk ona. Ami hotu haree ho matan iha ne’e, nia halo uluk mak foin koalia,”dehan nia.

Enkuantu, Koordenador CNE iha Postu Na’in Feto, José Alexander do Rodriges Pereirra Parada, hatete, durante sira nia observasaun hahú husi loron 2 to’o 15 ne’e, lao diak tebes, tanba kandidatu sira tuir duni orariu ne’ebé iha.

Tanba ne’e nia dehan, ba loron ikun espera kandidatu sir abele halo diak nafatin hanesan loron sira antes.

“Ami nia observasaun ba kampaña door to door, kandidatu numeru sorteiu 5, Anacleto Bento Ferreira ne’e lao diak, no mós programa sira ne’ebé kandidatu ne’e hato’o ba tinan lima nian diak tebes,”dehan nia.