Tanba, nia dehan, buat hotu analiza ho feitu ona iha sira nia aprezentasaun iha tempu kampaña durante loron 15 nia laran, buat hotu liu hotu ona, aat ka di’ak avaliasaun final ne’e, depende ona ba votante em-jeral, ba ema sosiedade no populasaun tomak.

“Maibé ha’u nia militante no partidu nia militante ho estrutura ne’e obrigasaun ida tanba, ha’u aprezenta kandidatura la’os hanesan individual no independente maibé mai husi partidu ida mak aprezenta nia kandidatu. Portantu, tanba partidu mak aprezenta ema hotu-hotu personalidade iha partidu nia laran iha obrigasaun ida atu apoia desizaun partidu nian, tantu militante, estruturantes no simpatizantes partidu nian laiha opsaun seluk, tenki vota ba numeru 5,”dehan nia.

Entretantu, molok ne’e, nia dehan, vota ba numeru 5 atu sai alternativa ida ba ukun no hasai TL husi siklu visiozu politika ida ne’ebé iha poder politika, ida mak ukun ida sai rejistente no ida fali mak ukun ida fali sai rejistente.

Tanba ne’e, nia dehan, nia espresa solusaun ida mai husi jerasaun foun no solusaun ida ne’ebé seidauk kontaminadu ho influensia politika husi forsa politika rejistente sira, atu ukun tuir saida mak sira hanoin no ukun tuir buat ne’ebé sira hakarak ba TL.

“Ha’u hanoin loron 19 loron ne’ebé determinante tebes atu halo mudansa politika ba ita nia rain, liu-liu juventude sira iha korajen natoon hanesan uluk ita tempu rejistensia nian, ita iha korajen natoon hodi hasoru inimigu sira hodi tulun ita nia aman sira hodi implementa sira nia planu neebé sira trasa ona. Nunee mós ohin loron ita kontinua nafatin iha korajen atu ukun tuir planu no pensamentu neebé sira hakarak atu ita nia rain bele hetan diak,”tenik nia.

“Loron 19 marsu, ha’u prontu atu lori valor juventude nian ba banti no lori nafatin prinsipiu ita nia aman sira nia hakarak ba rai ne’e”.

Enkuantu, tuir orariu kandidatu numeru sorteiu 5 sei vota iha Mui-Kuluhun, Postu Administrativu Cristu Rei, Munisipiu Dili, iha tuku 10:00 otl.