Ohin 18 Marsu, Governu fó loron pontu toleransia ba funsionáriu públiku sira hotu atu fila ba ida-idak nia munisipiu , hakmatek hodi bele tetu no hili kandidatu Presidente Repúblika ne’ebé bele sai aman ba ema hotu.
Sabdu aban 19 Marsu, mak loron ba sidadaun ida deside liuhusi votu ida ho sekretu ba destiñu kandidatu no futuru nasaun nian.
Tuir Presidente Comisaun Nasional Eleisaun (CNE), Jose Belo informa ba eleitór sira iha Timor laran tomak no iha nasaun seluk atu, aban iha tuku 7:00 dader hakbesik aan ba sentru votasaun hodi utiliza tempu ne'ebé osan mean ba Timor tomak nia futuru no nasaun nian.
"Husu ba populasaun tomak, no eleitór tomak, atu utiliza tempu ho di'ak, tempu ne'ebé mak osan mean ba Timor oan hotu, atu hakarak konstrui ba ita nia rai no kontribuisaun ba ita nia rai importante tebes, tanba ne'e labele fiar rumoris sira, eleisaun sei susesu to'o hotu", dehan nia liuhusi konferensia emprensa, iha salaun CNE, Larigutu, Kolmera, sesta (18/03).
Nia reafirma katak populasaun iha Timor laran tomak no iha rai li'ur atu labele fiar rumoris sira ne'ebé espalla iha media sosial, tanba ne'e fiar de'it ba instituisaun eleitoral hanesan STAE no CNE no Polisia sira no orgaun ne'ebé organiza eleisaun ne'e no garante katak eleisaun sei la'o ho di'ak.
Nia informa, karik mosu ameasa ruma kona-ba situasaun loron aban nian, parte PNTL sei hola medida tuir lei eleitoral katak sei kondena pena prizaun tinan tolu (3).
"Tanba ne'e ha’u husu ba ita hotu, atu nafatin mantein posizaun hodi hatudu ita nia matoridade no responsabilidade iha loron votasaun ne'e, tanba ita hotu hakarak halo Timor sai nasaun ne'ebé morin iha rai li'ur no ita hotu hakarak atu disidi futuru nasaun ne'e nia ho susesu", tenik nia.
Tuir lista Sekretáriu Tekniku Administrasaun Eleitoral (STAE) eleitor sira ba eleisaun prezidensial periodu 2022 to’o 2027 iha Timor-Leste hamutuk 859.613.
Populasaun iha Timor-Leste hamutuk 1.280,743. Husi total ne’e eleitórsira iha timor laran tomak hamutuk 859.613, númeru eleitór ne’e mai husi munisipiu 12 no RAEOA, postu-administrativu 65, suku 452, sentru votasaun 1.200 no estasaun votu 1.500.
