“Ami jura ba imi matebian sira no foho lulik, ami sei terus. Tau matan ba ami ba… Esforsu mai ami ba… Fó hanoin di’ak mai ami ba… Fó laran di'ak mai ami ba… Ami nia matebian sira, foho lulik no rai lulik,” dehan Xanana ho tanis liu husi diskursu bainhira partisipa Konsolidasaun MOKATIL ba dahuluk iha Bairru-Pité Hudi Laran-Dili, Domingu (18/06).
Xanana rekoñese seidauk halo buat barak ba rai doben ne’e, maibé husu perdua ba matebian, rai lulik no foho lulik hodi apoiu no fó hanoin nafatin ba povu kamponeza sira bele hala’o servisu di'ak liután.
“Ami seidauk halo buat barak ba rai ida ne’e. Ajuda mai ami nia hanoin mai ami hodi ajuda ami servisu. Matebian sira, ami hakru’uk nafatin ba imi… Ami fó harohan nafatin ba imi… Maromak iha leten aas ba ami harohan nafatin ita ajuda ami. Ami kaer rai lulik ida ne’e, horon rai nia iis, kaer rai ida ne’e, kaer tahu dois, ne'ebé tulun ami,” dehan ho tanis.
Eis Komandante em Chefe das FALINTIL ne’e hateten, fó laran hakmatek timoroan sira, tanba rai ida ne’e presiza pás, presiza ema hotu atu hamutuk, esforsu boot servisu maka’as hodi kumpre devér.
Nia dehan, matebian sira nia onra no sakrifísiu povu Timor sei la haluha. Tanba ne’e, hamutuk nafatin ho povu ida ne’e hodi hametin pás tanba povu hakarak moris iha hakmatek nia laran.
Konsolidasaun Primeiru MOKATIL
Entretantu Movimentu Kamponeza Timor Leste (MOKATIL) mós halo konsolidasaun ba dala uluk hodi halo kompromisu ba tinan lima nian hodi hala’o atividade ne'ebé durante ne’e hala’o.
“Kamponeza liu husi ekonomia iha agrikultura no turizmu buat barak iha kamponeza, tanba ida ne’e mak ami ho Maun Boot Xanana Gusmão atu halo kompromisu ne’e”, dehan Prezidente MOKATIL, Arsénio da Silva Pereira,
Tanba ne’e, ba futuru MOKATIL sei la hakmatek programa ne'ebé hala’o ona durante tinan barak nia laran.
“Ha'u hanoin ba futuru kuandu ne’e hotu ona, ami sei hala’o programa sira ne'ebé ami halo,” tenik nia.
Tanba MOKATIL ho Governu iha kompromisu ida atu fó apoiu subsídiu ba MOKATIL atu hala’o programa ne’e durante tinan lima nia laran. Tanba misaun no vizaun MOKATIL nian atu dezenvolve iha setór agrikultura nian.
Ne’e duni, nia garantia katak liu husi programa ida ne'ebé Movimentu Kamponeza Timor Leste hala’o ne’e ekonomia Timor Leste di'ak, prósperu no igualdade.
“Se Governu iha kompromisu atu fó subsídiu ba sira ne'ebé ami sei hala’o to’o ami hetan susesu no iha mandatu tinan lima ne’e katak povu kamponeza sei ekonomia ne'ebé di'ak, prósperu no igualdade,” dehan nia.
Entretantu, konsolidasaun MOKATIL ne’e foin primeira-vés, maibé atividade ne’e rasik hala’o tinan barak ona, hahú Timor Leste hetan independénsia mai to’o agora.
Tanba ne’e, Arsénio informa katak, ema ne'ebé durante ne’e halo rejistu iha MOKATIL kuaze 28.000. Membru sira ne'e, mai husi munisípiu sanulu resin rua inklui Rejiaun Autónomu Espesiál Oekusi-Ambenu (RAEOA).
