Ministru Reformasaun Lejizlativa no Asuntu Parlamentár, Fidelis Magalhães hatete, Xanana Gusmão lider bloku AMP no governu atuál ne’e mós mai husi AMP, ne’ebé lidera husi Primeiru Ministru, Taur Matan Ruak.

“Governu ne’e governu AMP nian ne’ebé lideradu husi Primeiru Ministru, Taur Matan Ruak, fó forsa no kbiit ba governu ne’e mai husi Parlamentu Nasionál liu husi bankada AMP nian”, dehan nia, iha Uma Fukun PN, horisehik.

Atu garantia estabilidade governativa ne’e presiza kadeira 33 iha PN, maibé AMP iha kadeira 34 aumenta rua husi UDT no Frente Mudansa (FM), entaun daudaun ne’e iha kadeira 36 ne’ebé sei fó kbiit no forsa ba governu.

Iha fatin hanesan, Prezidente Parlamentu Nasionál, Arão Nóe de Jesus hatete, rezignasaun Xanana nian husi lista kandidatura ne’e desizaun individuál, hodi hili dalan polítika iha li'ur mak atu apoiu ba governu ka oinsá ne’e depende nia.

“Ha’u hanoin nia rezigna aan ne’e husi lista kandidatura ba membru governu ne’e nia la'ós rezigna aan husi AMP tanba ne’e sei laiha implikasaun ba estabilidade governativa ne’e”, dehan nia.

Arão hatutan, rezignasaun maun boot nian ne’e ho razaun atu foku liu ba negosiasaun Greater Sunrise no kadoras nian, tanba asuntu ne’e importante tebes liu sira seluk, tanba ne’e interese nasionál ba futuru nasaun nian.