Ministru Estadu no Prezidensiál Konsellu Ministru, Hermenegildo ‘Agio’ Pereira dehan, kona-ba negosiasaun prosesu mina matan Greater Sunrise Prezidente Delimitasaun FM, Xanana Gusmão, mak lidera prosesu tomak bainhira hetan konfiansa husi Maritime Boundary Office hodi negosiasaun ba mina matan.

“Maun boot sei determina atu hahú, sei iha kalendáriu nune’e iha akordu atu implementa Timor Liquid Natural Gas (LNG)”, dehan nia, iha Uma Fukun Parlamentu Nasionál, Sesta (27/7).

Nia dehan, ho prosesu ne’e tomak Xefe Negosiadór Delimitasaun FM sei buka dalan atu kontinua tan prosesu negosiasaun oinsá esplora mina matan Greater Sunrise ne’ebé tuir planu sei esplora iha Timor Leste.

Ho prosesu ne’e tomak, Xanana Gusmão entrega karta rezignasaun ba Primeiru Ministru, Taur Matan Ruak, nu’udar Ministru Konselleiru Primeiru Ministru, nune’e bele foku lidera prosesu negosiasaun fronteira marítima ho rai maran entre Timor Leste ho Indonézia.

Agio dehan, Xanana Gusmão rezigna aan tanba sirkunstánsia mak obriga hodi konsentra diskusaun fronteira marítima ho rai maran entre TL ho Indonézia komplikadu hela, inklui mós prosesu atu monta LNG Timor.

Tanba ne’e, Governu ne’ebé lidera husi Primeiru Ministru, Taur Matan Ruak, kontinua apoia xefe negosiadór delimitasaun FM ne’ebé planu atu diskute ho Indonézia.