Primeiru Ministru, Taur Matan Ruak hatete, programa ne’ebé iha governu sei haka'as aan hodi rezolve fronteira terrestre entre Timor-Leste ho Repúblika Indonézia ne’ebé hela uitoan de’it atu konklui ona, nune’e bele ba ko'alia fali fronteira marítima nian.

“Iha tinan lima nia laran ha’u sei servisu makaas hodi tau matan ba ita nia fronteira terrestres no marítima ho Repúblika Indonézia depois ita kontinua tau matan ba Greater Sunrise”, dehan nia, iha Uma Fukun PN, Sesta (27/7).

Antes ne’e, deputadu Bankada FRETILIN, Antonino Bianco, kestiona programa Governu Aliansa Mudansa ba Progresu (AMP), tanba durante kampaña halo promesa barabarak atu dada kadoras ka Greater Sunrise mai iha Timor. Maibé iha programa la hakerek atu dada kadoras mai Timor.

“Ha’u hakarak governu justifika bainhira mak governu AMP atu dada kadoras mai iha Timor tanba povu hein hela promesa hira ne’e”, dehan nia.

Hataan ba kestaun ne’e, PM Taur dehan, investimentu ne’ebé governu halo durante ne’e fonte reseita barak liu mai husi fundu petrolíferu, tanba ne’e presiza dezenvolve Greater Sunrise.

“Kadoras iha ha’u nia mandatu tinan lima la dada mai iha Timor ha’u hanoin iha ema seluk nia governasaun sei dada mai. Tanba ne’e, promesa ne’ebé halo ona ba povu”, tenik nia.

Produsaun Greater Sunrise presiza tebes tanba bele emprega joven timoroan barak hodi dudu dezenvolvimentu ekonomia iha rai laran.