Sekretáriu Ezekutivu Komisaun Nasionál Kombate Moras HIV/SIDA (KNKS-TL) Daniel Marçal hateten, ema tinan produtivu barak maka afeta ba virus HIV/SIDA, signifika bainhira la halo prevensaun di'ak agora Timor-Leste sei lakon rekursu jerasaun foun.

“Ita nia fini sira ne'ebé atu ukun rai ida ne’e sira balun matenek, sira balu hanoin no vizaun di'ak, maibé sira falla ba sira nia hahalok, ne'ebé sira la halo konxiénsia didi'ak bele estraga sira nia futuru no impede mós sira nia mehi”, dehan nia, iha iha Salaun Kanosiana Madre Bekora, horisehik.

Tanba ne’e, KNKS-TL habelar informasaun ba estudante eskola sekundária no komunidade sira, liuliu juventude sira oinsá atu hamutuk kombate virus ne’e.

Feto barak tinan ki'ik ko'us oan, kaben sedu no balu seidauk akaba eskola sekundária hetan oan no oinsá jerasaun nasaun ne’e dezenvolve nasaun ne’e ba oin. Pior liu, afeta tan HIV/SIDA ne'ebé impaktu ba saúde.

Iha fatin hanesan, Xefe Suku Bekora, António da Silva Soares sente kontente tebes ho prezensa KNKS-TL ne'ebé fahe informasaun kona-ba moras ne'ebé ameasa ema nia vida.

Ho loron korezma ne’e, divulga informasaun ba joven Bekora sira hodi hatene liu tan saida maka moras ne’e, atu bele fahe tutan informasaun ne’e ba iha komunidade no ida-idak nia família.

Xefe suku ne’e mós sujere ba iha komisaun nasionál atu labele fahe informasaun ne’e iha fatin públiku de’it, maibé informa to’o iha bairru-bairru, tanba dala barak ema seidauk komprende di'ak kona-ba moras ne’e.