Timor-Leste konfirmadu kazu positivu ba coronavirus (COVID-19) hamutuk na'in haat (4), ema estranjeiru ida ne'ebe rekooperadu, Timor-oan ida uluk sei iha izolamentu, no timor-oan aumenta tan na'in rua.
Dra. Odete esplika , kolega na'in rua ne'ebe positivu COVID-19, tama iha grupu ida ho kolega ida ne'ebe antes ne'e hetan positivu. Sira hamutuk na'in walu (8), ne'ebe mak halo viazen husi Kupang-Indonesia mai fronteira-Batugade.
Nia hatutan, ema na'in walu (8) ne'e husi kupang mai Batugade ho Bus Travel, no husi Batugade mai Dili ho Bus Maliana ida. Nia esplika, pasajeiru hamutuk iha bus Maliana ema na'in 25, la inklui sofer no ajudante na'in rua.
Grupu ida husi kupang ne'e, na'in tolu mak positivu ona no agora iha fatin izolamentu Vera Crus Dili. Ema na'in tolu ne'e ho kondisaun di'ak, laiha isin manas, no laiha mear.
Na'in lima sira seluk husi grupu ida ne'e, sei hela iha fatin karantina, Hotel katuas, no sei halo teste ba sira.
"Sira na'in hirak ne'ebe mai hamutuk ho kolega na'in tolu husi kupang ne'e agora dadauk iha hela Hotel Katuas. Sira sei halo testu, ita hein ohin k aban nia rejultadu sei iha positivu k negativu ita sei hatene,"dehan dra. Odete, iha CCD, segunda ohin.
