Timor-oan sira ne’ebé positivu coronavirus ne’e foin fila ho grupu hamutuk na'in walu (8) ho bus travel ida husi, Kupang-Indonesia via terrestre, Mota-ain, iha loron 1 fulan-Abril 2020. Timor-oan sira hela iha karantina Hotel Katuas hamutuk abitante na’in 37.

Total abitante na’in 37, halo teste no buka tuir istoria kontaktu no interasaun sosial ho ema ne’ebé positive COVID-19.

Hafoin liu husi prosesu teste, rejultadu hatudu aumenta tan timor-oan na’in rua positivu COVID-19.

Portavoz SIJK, nuudar mós Diretora Jerál Prestasaun Saúde-Ministeriu saúde (MS), dra. Odete Viegas informa katak, timor-oan na’in rua tan positive COVID-19.

Nunee’, nia relata katak iha Timor-Leste positivu COVID-19 hamutuk na’in haat (4) ona. Ida sidadaun estranjeiru rekoopera ona, no kazu foun ba timor-oan na’in tolu.

“Kazu informadu na’in haat, foun na’in rua tan ne’ebé aumenta ho ida ne’ebé antes ne’e, ho ida seluk rekoopera on, nunee hamutuk na’in haat. Kolega na’in rua ne’e tama iha fatin ne’ebé antes ne’e kolega ida positive,”dehan Odete, iha sentru konvesaun Dili, segunda (13/4).

Nia dehan, Timor-oan sira ne’ebé positivu COVID-19 mai husi Indonesia. Na’in rua ne’e agora iha fatin izolamentu Vera Cruz Dili. Na’in rua ne’e kondisaun diak, la hatudu sintomas, laiha mear, laiha isin manas.