“Maluk sira ne’ebé iha distritu, hanesan bus Maliana, aban ita tuun hodi hasai sira nia amostra, maski sira seidauk iha sintomas, ita tenki hasai ona atu limite númeru transmisaun,”dehan dra. Odete, segunda ohin, iha CCD Dili.
Dra. dehan, ekipa vijilansia sei halo testu hodi hatene kondisaun pasajeiru sira ne’ebé halo kontaktu ho sira ne’ebé positivu.
Timor-oan na'in rua ne'ebe positivu COVID-19, tama iha grupu ida ho kolega ida ne'ebé antes ne'e hetan positivu. Sira hamutuk na'in walu (8), ne'ebe mak halo viazen husi Kupang-Indonesia mai fronteira-Batugade.
Pasajeiru na'in walu (8) ne'e husi kupang mai Batugade ho Bus Travel, no husi Batugade mai Dili ho Bus Maliana ida pasajeiru hamutuk na'in 25, la inklui sofer no ajudante na'in rua.
Grupu ida husi kupang ne'e, na'in tolu mak positivu ona no agora iha fatin izolamentu Vera Crus Dili. Ema na'in tolu ne'e ho kondisaun di'ak, laiha isin manas, no laiha mear.
