Ne’e duni, atu substitui fila-fali ninia fatin, Forum Organizasaun Naun Governamentál Timor-Leste (FONGTIL) presiza haruka karta ruma KKFP hodi nomeia ema foun ruma.

Koordenadór Core Group Transparency (CGT) Sabino Fitun hatete, prosesu atu delega reprezentante sosiedade sivíl ba KKFP ne’e parte FONGTIL mak fasilita hodi lori Mericio Akara ba iha ne'ebá hodi lori aspirasaun sosiedade sivíl tomak nian.

Maibé agora daudaun ne’e Akara rezigna-aan ona husi Luta-Hamutuk hodi envolve aan ona iha partidu polítiku. Tanba ne’e, la merese ona atu reprezenta sosiedade sivíl iha KKFP.

“Agora tama ona partidu polítiku ne’e, nia iha KKFP reprezenta sosiedade sivíl ka reprezenta partidu”, tenik nia, iha nia servisu fatin Fatumeta, foin lalais ne’e.

Ne’e duni, husu konxiénsia morál ba Mericio Akara atu rezigna-aan husi KKFP atu bele delega fali ema seluk hodi reprezenta sosiedade sivíl.

Nia mós husu ba FONGTIL atu halo ona enkontru estra-ordináriu atu bele halo ona substituisaun ba Mericio Akara, tanba sira la merese ona atu tuur iha ne’ebá.

Relasiona ho ezijénsia ne’e, diretór Ezekutivu FONGTIL, Arsénio Pereira hatete, tuir prosesu normál ema atu reprezenta sosiedade sivíl ba iha KKFP tenke tuir duni FONGTIL atu bele delega nia ema tuir sistema demokrasia hodi ba iha ne’ebá.

Tanba ne’e, membru sira ezije atu substitui sira tenke fó karta mai iha sekretariadu atu bele organiza prosesu ne’e, maibé kuandu ko’alia de’it ne’e labele.

“Ha'u hanoin membru sira ezije ida ne’e sira tenke lori karta mai iha FONGTIL ami bele organiza, mais agora ami mak atu organiza ne’e laiha”, dehan Arsénio.

Tuir nia, mandatu ne’e mós besik ona atu remata, normalmente tama ba iha lejizlasaun foun sei simu karta husi sekretariadu KKFP atu bele organiza hodi nomeia fali reprezentante sosiedade sivíl foun ba iha ne'ebá.

Entretantu, diáriu ne’e kontakta ona ba Mericio Akara relasiona ho ezijénsia ne’e, maibé la atende.