“Ami fiar katak ho manutensaun no aprofundamentu husi diálogu ne’ebé halo ona entre Xefe Estadu no Xefe Governu, kona-ba personalidade ne’ebé tenke hetan nomeiasaun atu tama mai iha Governu”, dehan Taur, iha diskursu tomada-de-pose ba Ministru Defeza, Filomeno Paixão, iha Palásiu Prezidensiál Bairru-Pité, horisehik.

Nia hatutan, Iha tempu badak Prezidente Repúblika ho Primeiru Ministru sei buka dalan rezolve impase polítika ne’ebé akontese.

Ne’e duni, PM Taur kontinua ezije ba Xefe Estadu tenke hakotu ona nomeasaun atu kontinua tan fó pose membru Governu seluk hodi kompleta lista VIII Governu konstitusionál nune’e serve ba Estadu.

Entretantu iha diskursu ne’e hatutan, sistema governu semi-prezidensiál ne’e ezijente no obriga responsavel polítiku sira hotu halo esforsu nafatin, liuliu ba sira ne’ebé maka hanesan titulár ba órgaun soberania sira atu tenke buka halo diálogu.

Nune’e, debate no hetan solusaun sira ba kompromisu ne’ebé bele viabiliza funsionamentu Estadu nian no ho ida-ne’e, labele fó obstakulu ka impede dezenvolvimentu no hadi’a kondisaun moris povu hodi hatán interese públiku.

Tanba ne’e, Primeiru Ministru sente seguru iha kuadru normalidade konstitusionál nia laran, katak hotu-hotu sente orgullu no regula husi prinsípiu sira respeitu no lealdade institusionál.